admin
Thokozile Mbedzi
ZILOKHU zinkemile izakhamizi zesigabeni seNyankuni eSigodini ngemva kokuba enye indoda iwele phakathi komgodi idakiwe.
Kubikwa uGarikayi Ncube oleminyaka engu-35 yokuzalwa ubenatha utshwala lomngane wakhe mhlaka 13 Nkwenkwezi eBlackbird Mine wacina esehluleka ukuya lapho ahlala khona walala eceleni kwegodi okwembiwa kulo lapho acine ewela khona phakathi.
Ekhuluma lentatheli kaMthunywa uMnumzana Joel Moyo uthe uNcube uwele egodini elele.
“UNcube kukhanya wadakwa kakhulu waze walala eceleni kwegodi lapho acina sewela khona esejumekile.
“Asazi ukuthi watshelela njani wawela phakathi ngoba umngane wakhe wamtshiya lapho waya lapho alala khona.
Kuthe ngemva kwesikhatshana umfowabo wezwa umuntu esehlaba umkhosi kanti nguGarikayi owayesewele phakathi kwegodi yikho ukugijima kwethu sesisiyazama ukumkhipha kodwa wayevele esephefumula nzima,” kutsho uMnu Moyo.
Kubikwa uNcube wabhubha esanda kufika esibhedlela.
Online Reporter