adminYiNtatheli kaMthunywa
ABADLALI be-galufu kuleli abalandaba lokutshisa kwelanga leHwange nanko phela inengi labo liqonde kulindawo ukuyancintisa kuKamandama Memorial Golf Open kulimpelaviki.
Umncintiswano lo uqhutshwa minyaka yonke njengesikhumbuzo sezimbamgodi ezadilikelwa ngumgodi eHwange ngo1976.
Umdlalo wegalufu lo ngowokuncedisa ukudinga imali ephathisa imuli zezimbamgodi ezedlulayo emhlabeni.
Kubikwa umncintiswano lo uzaqhutshwa ngezinga elingakaze libonakale, nanko phela kulabadlali abanengi abathembisa ukudlala.
Kusasa abadlali abedlula ikhulu lengxenye bazadibana kuhlandla lama-ProAm kubangwa imvuzo etshiyeneyo egcekeni lomdlalo lo edolobheni leHwange. Intshantshu zabadlali abaphuma kumakilabhu agcwele ilizwe lonke lazo zizancintisana kumalanga alandelayo.
Izazi zalumdlalo ezikhulume lephephandaba likazulu zithe lonyaka iKamandama Memorial kumele inqotshwe ngabadlali abahlala kulindawo ababalisa uPhilip Tshuma loSteven Simukai.
Omunye okhangelelwe ukuthi abambe intambo nguRobson Saurombe, oseyintshantshu engabuzwayo kugalufu yeHwange.
Kusukela uqala ukudlalwa, umncintiswano ubusekelwa ngamankampani amanengi, ikakhulu lawo asebenzelana lezimbamgodi zeHwange Colliery.
Usaziwayo kweze-golf, uTongo Charamba, utshele intatheli ukuthi lonyaka uzafuna ukudlala ukwedlula bonke.
Uthe ngaphandle kokutshutshiswa ngumncintiswano, ukudlala kuKamandama Memorial kubaluleke ukwedlula ukunqoba ngoba kuyisikhumbuzo sengozi eyawela isizwe.
“Ngiyakhona eHwange ukuyoba yingxenye yabadlali abazaphatheka kuKamandama Memorial. Inhloso yami ikunombolo yakuqala.
“Ukunqoba akuqakathekanga kodwa isikhumbuzo sengozi ka1976 yiso esidlala ngaso. Kuhle ukuba sisebenzisa ezemidlalo ukuthi sihlanganise imali ephathisa imuli ezalahlekelwayo.”
Kusukela ngomnyaka ka2011, uCharamba ubeqeda ekunombolo yesibili.
Abanye abadlali okumele baqaphelwe nguBrian Gondo osehluphile koBulawayo.
UVumi Moyo, ukaputeni wegalufu yeHwange uthe balokuthaba ukuthi inkampani yeHwange Colliery iqhubekela phambili isebenzisa umdlalo wabo kusikhumbuzo seKamandama.
UMoyo uthe umncintiswano lo unxuse abadlali abasafundela kanye lalabo abaziwa bezingcitshi.
Ekhuluma loMthunywa kuliviki, uMoyo uthe: “Umnyaka lo kukhanya kukuhle kumdlalo we-golf lapha eHwange. Amankampani ayabuthana kumdlalo wethu njalo yonke imincintiswano yethu ibilosekelo olumangalisayo.
“Ngithanda ukubonga inkokheli zeHwange Colliery ngoqhubekela phambili lomdlalo we-golf. Ngilethemba lokuthi abanengi bayavumelana lami ukuthi lumncintiswano usuphumelele kakhulu kwelakithi ngenxa yosekelo lwemali.”
Online Reporter