adminYiNtatheli kaMthunywa
UMAQHUZU wenhlanganiso yeHockey Association of Zimbabwe (HAZ), uHumphrey Chigwedere usebike ukuthi umdlalo we-hockey lawo uzakhula ezikolo zakuleli, ufane leminye imidlalo nanko phela inhlanganiso le isebenza gadalala ukuze kuthuthukiswe umdlalo lo.
Ekhuluma loMthunywa kuliviki uChigwedere ubike ukuthi inhloso yenhlanganiso yakhe ngeyokuthi kuthuthukiswe umdlalo lo kuzikolo lezo ezingakaze ziwudlale.
“Okwamanje sizama ukuthi senze umdlalo we-hockey lawo ubesezingeni eliphakemeyo njengeminye imidlalo.
Kudala ilizwe lakithi belisazakala ngomdlalo we-hockey. Ngenxa yomkhonomi welizwe odonsa nzima, inkundla ze-hockey lazo zacina zisifa ngakho lelizwe lakithi kalisenelisi ukubonakala njengamanye amazwe,” kutsho uChigwedere.
Kusenjalo, iHockey Association of Zimbabwe ibika ukuthi izaqhubekela phambili ikhankasela ukunxusa amazwe njengalokhu eyakwenza kumncintiswano wenkezo yeAfrica Cup of Club Champions (ACCC) owadibanisa amazwe ayisitshiya galombili ngoNcwabakazi nyakenye.
“Ukuqoqa imincintiswano enjangale kuncede kakhulu amathimu akuleli ngoba abadlali bayabona ubungcitshi babanye abadlali. Phezulu kwalokhu, inkundla zethu ezibalisa iBulawayo Hockey Stadium leMagamba eyeHarare zizasetshenziswa kanenginengi, okuyikho okumele kwenzakale.
“Inkundla yeKhumalo ingcono kulezinye eZimbabwe njalo isakhanya nxa kuqathaniswa lezinye inkundla elizweni lakithi.”
UChigwedere uqhubeke wathi: “Impahla esetshenziswayo kumdlalo we-hockey iyadula kakhulu.Siyazama sibili ngoba phose ezweni lakithi izabelo eziyisikhombisa ziyanelisa ukudlala i-hockey.”
Online Reporter