Online Reporter
Nkosilathi Sibanda
UMQEQETSHI wamaWarriors uKaitano Tembo uqale umsebenzi wakhe wokuba ngumqeqetshi weqembu lelizwe ngokunqotshwa ngamabhola amabili kweleqanda yiNigeria kumdlalo we-Unity Cup Semi-Final obuse-The Valley, London ngoLwesibili ebusuku.
AmaWarriors anqotshwe liqembu leNigeria ebelibadlali abasakhulayo abanengi. Umqeqetshi walo u-Eric Chelle ukhethe ukunikeza abadlali abangavamanga ukuphiwa ithuba.
INigeria iqale ngamandla yabhoboza umambule ngomzuzu wesihlanu ngomdlali uFemi Azeeze.
AmaWarriors aphosa abasengozini yokuhlohlwa ngemva kwemizuzu emilutshwana lapho unozinti uFuture Sibanda ephunyuke ibhola phakathi kwebhokisi, kodwa waphangisa walikhupha engozini
Kancane kancane amaWarriors angena emdlalweni njalo adala ithuba lawo lokuqala elibonakalayo ngomzuzu wesi-18.
UMarshall Munetsi uvimbeleke ukudubula ibhola kwathi uJunior Zindoga utshaye ibhola le-corner kick ngekhanda, kodwa ladlula eceleni kancane.
UJonah Fabisch laye uzamile ukudubula ekhatshana ngomzuzu wesi-23 kodwa ibhola lakhe laphuma eceleni.
UZindoga uphinde wathola elinye ithuba ekupheleni kwengxenye yakuqala kodwa wavinjwa ngaphambi kokuthi uTawanda Chirewa akhabe ibhola eliphendukileyo laphuma eceleni.
Lanxa iNigeria yehlise ijubane ekupheleni kwengxenye yakuqala, iqhubekile idala amathuba amahle kodwa yehluleka ukwengeza amanye amabhola ngaphambi kwekhefu.
AmaWarriors aqale kuhle ingxenye yesibili njalo aba lesikhathi esihle ephethe ibhola, kodwa ehluleka ukudala amathuba acacileyo phambi kwegedi.
INigeria iqede umsebenzi ngomzuzu wesi-62 lapho u-Azeeze afake khona ibhola lakhe lesibili.
UTembo uzamile ukuguqula umdlalo ngokufaka uDaniel Msendami, Washington Navaya, Abubakar Moffat loMongameli Tshuma, kodwa ukutshintsha lokho kwehluleka ukuguqula indlela umdlalo obuhamba ngayo.
AmaWarriors athole ama-set pieces amanengi ekupheleni komdlalo kodwa ehluleka ukuwasebenzisa, iNigeria yaze yaqeda umdlalo inqobile nge-2-0.
IZimbabwe isizadibana leqembu elizanqotshwa phakathi kweqembu le-India leJamaica emdlalweni wokudinga indawo yesithathu.
