adminDube Msilisi
INHLANGANISO yeZimbabwe Rural Development (ZRD) isinikeze abalimi bakoNhlupho eMatobo imitshina yokuchola idobi kunye lesigayo ukwenzela ukuba benelise ukuthengisa izilimo zabo sezilungele ukudliwa njalo sezilenzuzo engcono.
Inhlanganiso le ithi ikhethe ukuba incedise abalimi bemakhaya ukwenzela ukuthi benelise ukuziphilisa lezimuli zabo. UMnumzana Gerald Murungweni osebenza kulinhlanganiso uthe banikeza abalimi laba imitshina le ukuze babe ledlabuzane lokuqhubekela phambili ngokulima.
“Sananzelela ukuba abalimi laba bayalima kodwa kabalamitshina yokuchola kumbe ukulungisa izilimo zabo.
Njengoba sesibanike imitshina le siyakholwa ukuba sebezenelisa ukulima ngamandla ngoba besazi ukuba sebezathengisa izilimo zabo sezilungisiwe.
“Okunye futhi esikwenzileyo sibakhele indawo lapho abazabe bethengisela khona izilimo zabo. Abalimi laba sebezakwenelisa ukuthengisa amatamatisi, imibhida kunye lezinye izilimo zingatshiswanga lilanga,” kulandisa uMnu Murungweni.
Omunye umlimi uNkosazan Dorcas Dube uthe ukuphiwa kwabo imitshina le kuzabenza basebenze gadalala.
“Njengoba sesiphiwe imitshina le kutsho ukuthi sesizalima ngamandla ngoba sisazi ukuba singavuna sizathengisa izilimo zethu sezifanele ukudliwa. Siyayibonga inhlanganiso le ngokusiphathisa ngemitshina. Mina ngihle ngayacholisa amazambane ami ngakho sengizathengisa sokulidobi okutsho ukuthi sengizathola imali engcono,” kulandisa uNkszn Dube.
Online Reporter