admin
Samkelo Tshuma
UZULU kanye labalimi sebexwayiswe ukuba bananzelele indlela abasebenzisa ngayo umlilo ngoba utshani sebomile ngakho kulula ukuthi umemetheke ugcwale iganga okucina kubangela ukufa kwenyamazana zendle kanye lokutsha kwamadlelo ezifuyo.
UMnumzana Dumisani Nyoni onguProvincial Agricultural Extension Officer weMatebeleland North kunhlanganiso yeAgritex wenze isixwayiso lesi ngenhloso yokuthi kwenqatshelwe imililo yendle etshabalalisa imvelo lenyamazana zendle.
“Kuvamile ukuthi ngesikhathi somqando abantu babase umlilo ezilindweni zamabhasi, kodwa nxa sebegada balutshwane abakhumbula ukucitsha umlilo oyiwo ocina ubangela ingozi.
“Imililo le yande ukutshisa imvelo egoqela izihlahla, utshani obuvikela umhlabathi kucine kusala kulugwadule. Lokhu kuphinda kulimaze njalo isivuno somlimi ngoba lapho okutshiswe khona umhlabathi kawuvundi ngoba uyabe ususe egcekeni,” kulandisa uMnu Nyoni.
Inyamazana lazo ziyafa nxa sekuthe kwamemetheka umlilo wendle.
UMnu Nyoni uqhubekele phambili wathi ngaphandle kokulimaza imvelo umlilo ulakho njalo ukulimaza umkhathi.
“Intuthu iyalimaza umkhathi ngokudiliza i-ozone layer okuyikho osekubangele ukuguquka komumo womkhathi esihlala sikhuluma ngakho kulezinsuku,” kutsho uMnu Nyoni.
Uphethe ngokuthi inyamazana zendle ziyaphathisa ekuthuthukiseni umkhonomi welizwe ngoba zilakho ukuthi zithengiswe kwamanye amazwe.
“Izethekeli ziyasuka kwamanye amazwe zizebona inyamazana lezi kumaGame Parks kungakho kungumlandu womuntu wonke ukuthi enqabele ukutshiswa kweganga ukuze inyamazana lezi zivikelwe,” kutsho uMnu Nyoni.
Online Reporter