admin
Buhlebenkosi Gaule
UMSEKELI kaMongameli welizwe uKhomuredi Phelekezela Mphoko ukhuthaze abalimi ukuthi babambane njalo bakhuthale nxa kufika amaphurojethi atshiyeneyo ezigabeni zabo ngoba kuyiyo kuphela indlela engabenza baphumelele.
UKhmrd Mphoko ukhulume lokhu ngesikhathi evakatshele ePollards Irrigation Scheme esigabeni seBubi esabelweni seMatabeleland North ngeviki ephelileyo.
Uthe abalimi akumelanga balindele ukusungulelwa amaphurojekithi ngabantu abavela khatshana ezigabeni zabo ngoba lokhu kuzabenza bangaphumeleli.
“Njengabalimi kumele lenze izivumelwano labamabhizimusi atshiyeneyo lokhu kuzalincedisa ukuthi lithole inzuzo engcono nxa selithengisa izilimo kumbe izifuyo zenu.
UKhmrd Mphoko uthe abalimi bePollard Irrigation Scheme elamalunaga angu-108 njalo belendawo engamahekitha angu-45 balakho ukuthola inzuzo enhle nxa bangasebenzisa umhlabathi wabo kuhle.
“Nginanzelela ukuthi indawo le ilomhlabathi ovundileyo kodwa umhlabathi lo awusetshenziswa ngemfanelo ngoba nxa usetshenziswa ngendlela eyiyo umhlabathi lo ulakho ukuletha isivuno esiphezulu.
“Okunye okungabe kusenza kubenzima ukuba abalimi lezakhamizi zeBubi bengenelisi ukusebenzisa lumhlabathi ngendlela eqondileyo yikuthi kabalamitshina efaneleyo okumele ibaphathise,” kutsho uKhmrd Mphoko.
UMgcinisihlalo wePollard Irrigation Scheme uNkosikazi Antillia Ncube uchaze ukuthi khathesi basanda kuvuna umumbu njalo bakhangelele ukuhlanyela indumba.
UNkkz Ncube uthe okwenza bengatholi isivuno esiphezulu yikuthi impompi ze-irigation abazisebenzisayo sezigugile njalo sezivuza amanzi kukanti wona ayabe evela khatshana.
“Impompi ze-irrigation sezigugile njalo sezivuza lokhu kwenza amanzi aphuze ukufika esivandeni sethu njengoba ayabe evela edamu elikhatshana ngenxa yalokhu kuthatha amahola ayisithupha ukuthi amanzi aze afike lapha,” kutsho uNkkz Ncube.
UKhmrd Mphoko uphethe ngokugcizelela ukuthi abalimi kumele bafunde ukuba lobudlelwano labosomabhizimusi ngoba lokhu kuzabancedisa ukuthi bathole abantu abazathenga izilimo abazivunayo.
Online Reporter