admin
Buhlebenkosi Gaule
INTSHA yeHwange isiziphe umlandu wokuphathisa amantombazana akulesisigaba ehluleka ukuya esikolo nxa esesikhathini ngenxa yokuswela impahla efaneleyo yokusebenzisa.
UMkhokheli weqembu labatsha leli elibizwa ngokuthi Leo njalo elisebenza ngaphansi kwenhlanganiso yeWankie Lwendulu, uMnumzana Praise Moyo uchaze ukuthi intsha yeHwange ibambane yabumba iqembu lokuphathisa abanye babo abaswela impahla etshiyeneyo yesikolo.
Kuviki ephelileyo iqembu le-Leo libhode idolobho leHwange liqhuba umkhankaso wokufundisa uzulu ngokuthi umntwana oyinkazana akumelanga ehluleke ukuya esikolo ngoba esethombile.
“Thina njengeqembu leLeo sinanzelela ukuba abantwana abangamantombazana abanengi ikakhulu emakhaya bayekeliswa isikolo nxa sebethombile kukanti abanye bayekela bodwa ngoba bengelampahla yokusebenzisa nxa besesikhathini.
“Umkhankaso lo ebesilawo kuviki ephelileyo ubungowokufundisa abantu ukuba umntwana oyinkazana ulelungelo lokuya esikolo njalo kumele nxa ehlangana lenhlupho kumele ancediswe engayekeliswa isikolo,” kutsho uMnumzana Moyo.
Uqhubekele phambili esithi ngosizo lwabaphathisikolo ebagoqela abaphathi beGebhuza High, Hwange High, Chilisa leKalope umkhankaso lo abawenze ngeviki ephelileyo ubancedis e ukuthi bathole amantombazana ehluleka ukuya esikolo nza esesikhathini.
“Phakathi kwalabo esibancedisileyo kulontombazana oleminyaka yokuzalwa engu-16 okutholakale ukuba uyahlala phose amaviki amabili angayi esikolo nxa esesikhathini ngoba eswela impahla okumele azisebenzise, ngokunjalo untombazana lo simtholele udokotela omncedise kungelambadalo,” kutsho uMnu Moyo.
UMnu Moyo uphethe ngokuthi balethemba lokuba ngalo umkhankaso abawenzileyo kuzaba lomehluko njalo bakhangelele ukuthi kungabi lomntwana oyinkazana ozekeliswa isikolo ngoba esesikhathini.
Online Reporter