admin
NguMsilisi Dube
NJENGENDLELA yokuvikela imikhuhlane ebangelwa yingcekeza, izakhamizi zesigabeni seBidi, eMatobo ziphakathi kokuqhuba uhlelo lokwakha izambuzi ukuze zivikeleke emkhuhlaneni.Kubikwa inengi lezakhamizi zalumango zike zahlaselwa ngumkhuhlane wesihudo ngomnyaka ophelileyo ngakho zibone kufanele ukuba zakhe izambuzi ukuze kulwisane lomkhuhlane lo.
Esinye isakhamuzi esikhulume loMthunywa, uNkosikazi Silethiwe Ngulube, uthe ukwakha izambuzi lezi kuzenza kuhlanzeke esigabeni sabo.
“Ngomnyaka ophelileyo abantu abanengi bahlaselwa ngumkhuhlane wesihudo ngakho lonyaka sibone kulicebo elihle ukuthi sakhe izambuzi ukuze singahlatshwa yimikhuhlane.
“Abantu bayazithengela impahla yonke edingakalayo ekwakheni,” kutsho uNkkz Ngulube.
Usobhuku walindawo uMnumzana Jeffey Ncube uchazele uMthunywa ecingweni wathi eminyakeni edluleyo inengi labantu belisebenzisa iganga yikho obekubangela ukuba kuqhamuke imikhuhlane le.
“Abantu bakithi bebesebenzisa iganga ngakho sabuthana njengesigaba savumelana ukuba umuzi munye ngamunye kumele ube lesambuzi egumeni.
“Iganga lonke laliphihlika ngengcekeza ngoba abantu bengela zambuzi lokhu bekufaka impilo zabantu engozini ngoba ubusithi lanxa uhamba egangeni uhambe unyathela ingcekeza le.
“Uhlupho esilalo yikuthi abantu abalamali yokuqalisa uhlelo lolu. Okwakhathesi silabantu abalitshumi kuphela asebeqalisile ukwakha izambuzi lezi,” kuphetha uMnu Ncube.
Online Reporter