adminMsilisi Dube
ABALIMI besigabeni seHope Fountatin budebuduze ledolobho lakoBulawayo baphathekile ngokulima izihlahla zesintu (herbs) ngoba zingumuthi oqinisa umzimba.Abalimi laba baqalise ukulima izihlahlakazana lezi ngemva kokufundiswa yinhlanganiso yeWorld Vision ngoba bevame ukuhlaselwa yimikhuhlane etshiyeneyo.
Kubikwa izihlahlakazana ezilinywa ngabalimi laba zigoqela i-sweet basil, comen grass, mint, moringa kunye le-garlic.
UMnumzana uThomas Sibanda olime isivande sezihlahlakazana lezi uthe umsebenzi wakhe lo uqhuba kuhle ngoba abantu bayazithenga izihlahlakazana lezi.
“Safundiswa yinhlanganiso yeWorld Vision kunye labalimisi bethu ukuthi izihlahla zesintu ziyelapha njalo ziyaqinisa umzimba nxa kuqathaniswa lamaphilisi wona abulala umzimba.
“Izihlahlakazana engizilimileyo zigoqela i-sweet basil, i-comen grass, i-mint, moringa kunye le garlic. “Izihlahlakazana lezi ziyagezisa isisu zihlambulule ingcekeza yonke,” kutsho uMnu Sibanda.
UMnu Sibanda uqhubekele phambili wathi isihlahlakazana se-sweet basil siyaphathisa ekugijimiseni lokuhlambulula igazi emzimbeni.
Omunye njalo umlimi uNkosazana Sithembinkosi Ndlovu uthe ukhangelele ukuphathiswa kakhulu luhlelo lolu ngoba izihlahlakazana abazilimayo zilusizo kakhulu empilweni zabo. Izihlahla lezi ziyaqinisa umzimba njalo lanxa unatha amaphilisi okucindezela igcikwane lengculazi ziyaqinisa amasotsha omzimba. Ikhiwa engilisebenzelayo liyawodisa izihlahlakazana lezi ezitolo ezinkulu koBulawayo ngakho abanye abalimi kumele bafunde ukulima izilimo ezitshiyeneyo ukuze bazitshayele imali,” kutsho uNkszn Ndlovu.
Kubikwa kwaqala kungabalimi abalutshwana ababelima izihlahlakazana lezi kodwa khathesi phose isigaba sonke eHope fountain siphathekile ukulimeni izivande lezi.
Online Reporter