admin
Msilisi Dube
ABALIMI beFigtree budebuduze ledolobho lePlumtree sebeveze ukuthi bathwele amagabha avuzayo ngokuswelakala kwedibha kulesisigaba. Lokhu sokubangele ukuthi inkomo zabo ziyedibha esigabeni seBhazha eMatobo okungumango owedlula amakhilomitha angamatshumi amabili nxa usuka eFigtree.
Omunye umlimi okhulume loMthunywa uMnumzana Japhet Nkomo uthe sebeleminyaka bengela dibha kulesisigaba njalo bake bazama ukuthi bazakhele elabo kodwa behluleka ngenxa kokusilela kwemali.
Ngenxa yobufitshane bezandla imizamo yabo yaphelela emoyeni.
“Saphiwa indawo lapho okumele sakhe khona idibha, sike sazama lokuqalisa lumsebenzi kodwa kwehlula ngenxa yobufitshane bezandla, imizamo yethu yaphelela emoyeni. Senelisa ukuthi sigebhele izigodo kwasala kunjalo,” kuchaza uMnu Nkomo.
Kubikwa ngenxa yobukhatshana bedibha leBhazha abanye abalimi sebezithengela imithi bazigcobele izifuyo zabo ukuze zingahlaselwa yimikhaza kukanti abanye sebethengisa inkomo zabo.
Umlimisi walindawo uMnumzana Evans Gumbo uthe abalimi abanengi sebaphela uthando lokufuya ngoba izifuyo zabo zihlaselwa yimikhuhlane etshiyeneyo.
“Abantu abanengi kulindawo babona kungcono ukufuya imbuzi kulenkomo ngenxa yokuswelakala kwedibha. Ngesikhathi sisanda kuhlaliswa kulindawo abalimi abanengi babefuyile sibili kodwa bacina sebethengisa izifuyo zabo ngoba besesaba ukuthi zilakho ukuhlaselwa yimikhuhlane,” kutsho uMnu Gumbo.
Uqhubekele phambili wathi bafisa ukuthi ngabe uHulumende uyabancedisa ngemali yokuthi bakhe idibha leli.
“Ukwakha idibha akusimsebenzi onzima ngoba izakhamizi zizimisele ukusebenzelana ukuze lakhiwe. Khathesi simiswe yikusilela kwemali,” kuphetha uMnu Gumbo.
Online Reporter