admin
Ethel Ncube
BATHWELE amagabha avuzayo abafuyi beChipale, eBinga ngabanye abafuyi okubikwa ukuthi sebethunga impongo zabanye ngenhloso yokuba zingazalisi imbuzi zazo.
UMthunywa uzwe ukuthi indaba le esiqina ngamandla iqale ekuqaleni kwawonalo umnyaka lapho omunye umfuyi uJabulani Sithole athola impongo yakhe ithungwe amaphambili ngentambo okungaba yingozi ezifuyweni.
Ekhuluma lentatheli omunye wezakhamizi zakule indawo uMnumzana Gerald Ndiweni uveze ukuba abantu bemangweni wakibo sebeganga ezifuyweni zabanye.
“Abantu balapha sebelomkhuba omubi njalo oyingozi ezifuyweni owokuzithunga. Impongo yakho ingaqala ukulandela eminye imihlambi isithole ezinsikazi emhlambini yakhona umnikazi nxa engafuni umhlobo wembuzi yakho uyayithunga ayixotshe ihambe.
“Iyathungwa ngentambo ukuze ingazalisi imbuzi zakhe futhi bangenza lokho ngeke ukwazi ukuthi ngubani okwenzileyo, uzayibona ingasahambi kuphela. Lo ngumkhuba omubi njalo uzasiqedela izifuyo,” kutsho uMnu Ndiweni.
Intatheli ixhumane lesinye njalo isakhamuzi uNkosazana Sazini Moyo laye ongumfuyi wembuzi kule indawo ochaze ukuba isenzo lesi sibalimazela izifuyo zabo.
“Eyami impongo sebeke bayithunga ngethwayini, ibisilamalanga ngisithi nxa ngivalela ezinye ngiyithola ingekho.
Ngithe kwelinye ilanga ekuseni ngayibona ingaphandle kwesibaya isehluleka ukuvuka ngathi ngiyayikhangela ngathola ithungiwe ngayiqhaqha.
“Ngabuza lapho eyayijayele ukuya khona bathi ayisibo, labo sebelamalanga bayicina. Siyacela ukuba izakhamizi ziyekele umkhuba lowu ngoba inotho kithi abantu abansundu yizifuyo zethu. Nxa umuntu engafuni omunye umhlambi bikela umnikazi kulokuthunga,” kutsho uNkszn Moyo.
Iphephandaba likazulu likhulumisane loMnumzana Jabulani Sithole laye olempongo yakhe eyathungwayo ukuze ingazalisi ezomunye imbuzi.
“Lokhu kubuhlungu njalo kuzasiqedela imbuzi zethu, umuntu othunga impongo zabanye sizambophisa singambamba nxa kusehlula siyazama isintu, akuhluphi lokho. Singeke sithule izifuyo zilimala njalo sigcinwe yizo umuntu azithunge ngethwayini ukuthi zingazalisi ezakhe, lokhu yikuganga.
“Umuntu ozithungayo asikamtholi kodwa singamthola kuphela uzazibonela akusensuku zatshwala nje nxa eqhubeka ngesenzo sakhe sizamthola sithunge yena azwe ubuhlungu bakhona,” kutsho uMnu Sithole.
Imizamo yokukhuluma losobhuku wakule indawo yehlule.
Online Reporter