admin
Thokozile Mbedzi
KULOSOMABHIZIMUSI weMbembesi eWest Nicholson otshiywe ebotshaniswe lonkosikazi wakhe ngoguluva bambalekela le-R45 000.
Kubikwa uAcknowledge Moyo oleminyaka engu-30 uhlaselwe ngoguluva abayisithupha kuviki ephelileyo esitolo batshontsha imali engangeR45 000.
Ekhuluma lentatheli uMelusi Sibanda uthe babone into yamehlo.
“Oguluva laba bafike endaweni yamabhizimusi eMbembesi bavula isivalo sesitolo sikaAcknowledge lonkosikazi wakhe uLangelihle.
“Oguluva laba babehlome ngenduku, amabhemba lemikhonto bafika babatshela ukuthi bafuna imali lakanye babapha.
“Okube buhlungu yikuthi baphinda njalo babahlukumeza ngemva kokuba sebethethe imali yabo. Bababophanisa ngemva kokuba sebethethe imali yabo babafulathela,” kutsho uSibanda.
Kubikwa bathi bebona ukuba oguluva sebehambile bahlaba umkhosi kwabuya abantu abafika babehlukanisa.
Isikhulumi samapholisa esabelweni seMatabeleland uInspector Loveness Mangena ebuzwa ngodaba lolu uvumile wathi solufikile ehofisini yabo.
“Udaba lukasomabhizimusi ohlaselwe ngamadoda ayisithupha solufikile ehofisini yethu. Sixwayisa uzulu ukuthi angagcini imali ezinkulu endlini kabazise emabhanga.
“Nxa besisa njalo imali emabhanga bangahlali bezihambisa sikhathi sinye kodwa kabatshintshanise izikhathi zokuhambisa imali zabo.
Uphethe ngokuxwayisa njalo uzulu ukuba kaxwayane lomkhuba wokuxoxela abangani ukuba sebelemalini sebefuna ukwenzani empilweni zabo ngezimali zabo.
“Uzulu kabe lemfihlo ngaso sonke isikhathi bengabohamba bexoxela inqe ngubani lapho abaya khona,” kuphetha ulnsp Mangena.
Online Reporter