Isivuliwe inkundla yokugijima

YiNtatheli kaMthunywa
INHLANGANISO ye-Bulawayo Athletics Board (BAB) ibika ukuba isivumela ukuthi ibhalise labo abangafuna ukugijima kumncintiswano wakuqala ozaqhutshelwa enkundleni yeWhite City ngenyanga ezayo.

Umncintiswano lo uvula isizini yomdlalo kodwa ngeviki edluleyo kuqhutshwe umqhudelwano wesabelo sakoBulawayo obuseMpopoma Park.

Umgcinisihlalo weBAB, uWatson Madanyika, uthe kuzancintiselwa ama-National Track and Field Championships ku-100m, 200m, 400m, 1 500m, 3 000m, 100m hurdles, 110m hurdles, 400m hurdles, 4×100m, long jump, triple jump, triple jump, High jump shot put le-discus.

Ukuze ubukele, kumele ubhadale imali engange-US$3 loba i$330 kwabancane, ikanti abadala bazabhadala i-US$4 loba i-$440.

Uthe zinengi inhlelo ezihlelelwe isizini ka-2022 okuhloswe ukuthuthukisa umdlalo ezabelweni ngazo.

“Simema izikolo, amakolitshi lamakilabhu ukuthi azobhalisa abagijimi babo.

Silethemba lokuthi kuzaba lenani elikhulu lalabo abazagijima kulumcimbi ikakhulu njengoba izinto sezivulekile kulumnyaka njalo manengi amathuba okuthi sibe layo yonke imicimbi ngokwekhalenda lethu lesizwe lelesabelo sakoBulawayo,” kutsho uMadanyika.

Ngokwekhalenda yeNational Athletics Association of Zimbabwe (NAAZ), iOld Mutual ilokhe isekela linhlanganiso emijahweni yomgwaqo, ehlanganisa imijaho eyisithupha ezindaweni ezehlukeneyo elizweni, okuhlanganisa leTanganda half-marathon eMutare.

Eminye yemidlalo ezaqhutshwa yiNAAZ izagoqela eyeNational Open, eyeNational Junior Championships, eyeInter-Club Championships eHarare lakoBulawayo kanye leyeNational Inter-provincials.

UMadawanyika uthe bakhuthaza abagijimi koBulawayo ukuthi baphatheke kweminye imijaho ebalisa laleyo eqhutshelwa phetsheya kwelizwe.

Kusenjalo, kubikwa izaphenduka ngomfutho iComrades Marathon, osekuphele iminyaka emibili imisiwe ngenxa yeCoronavirus.

Lokhu kuqinisekiswe ngumgcisihlalo weComrades Marathon Association (CMA), uMqondisi Ngcobo.

Lo ngumjaho webanga le-90km njalo uzagijinywa mhlaka 28 Ncwabakazi kumango osuka eMgungundlovu uphelele eThekwini kwele-South Africa.