admin
Ethel Ncube
KWEHLE iyezi elimnyama kwenye imuli yakoChirumanzu ngemva kokuba ixhegu elileminyaka engu-71 ligalule lomzukulu walo bebhukutsha echibini.
Indaba le yenzakale ngeviki ephelileyo lapho uAmos Everisto Mukashi oleminyaka engu-71 abebhukutsha khona lomzukulu wakhe uAmos Tafadzwa Mukashi oleminyaka yokuzalwa engu-10 echibini, andubana bagalule.
Kubikwa ukuba ukhulu uMukashi wasuka labazukulu bakhe abathathu bayabhukutsha echibini eliseduzane lalapho abahlala khona.
Ekufikeni kwabo ukhulu lomzukulu oleminyaka elitshumi beqela emanzini lapho abahle baqala ukugalula khona.
Omunye wabazukulu wagijima wayabika ngekhaya izakhamizi zabuya zigijima ngokuswelakala kwenhlanhla bafica sebendenda emanzini.
UMthunywa uxhumane lesikhulumi samapholisa eMidlands uInspector Emmanuel Mahoko oveze ukuba indaba le sebeyamukele.
“Indaba yabantu ababili abagalule bafa siyitholile. Sithanda ukukhuthaza uzulu ukuba angangeni emanzini, emachibini kumbe ezifuleni ikakhulu nxa izulu lisina,” kuphetha uInsp Mahoko.
Online Reporter