admin
LIMISIWE emsebenzini ipholisa (39) elisolwa ngokunika izibotshwa utshwala kanye lensangu esitokisini sesiteshini samapholisa ePhalaborwa eSouth Africa.
Okhulumela amapholisa eLimpopo uBrigadier Motlafela Mojapelo uthi leli pholisa lisolwa ngokunikeza izibotshwa izidakamizwa ngoMpalakazi mhlaka 31 okuyinto ebangele ezenzweni zodlame nphakathi esitokisini.
“Kuthiwa izibotshwa zadakwa ngemva kokuthatha lezi zidakamizwa zahlasela ezinye izibotshwa,” kutsho uMojapelo.
Kuvulwe amacala ayisithupha okuhlasela ngenhloso yokulimaza lamabili okudlwengula.
“Abasolwa ababili abaleminyaka engu-23 leo-39, oyedwa ubotshelwe icala lokubulala kukanti omunye ubotshelwe icala lokuphanga, babekwe amacala okuhlasela kanye lokudlwengula,” kutsho yena.
Kusenjalo, uKhomishana wamapholisa kulesi sifundazwe uLieutenant General Thembi Hadebe uqinisekise umphakathi ukuthi izitokisi ziqatshwa ngelokhozi ngokuhambisana lemigomo yangaphakathi yokusebenza.
Uthi isehlakalo esenzeke esiteshini samapholisa ePhalaborwa singesizimele esingidwa ngaphakathi ukuze kuqinisekiswe ukuthi umsolwa uthathelwa amanyathelo afaneleyo.
Izibotshwa ezithintekayo zivelile enkantolo kaMantshi wePhalaborwa, zabekwa amacala ayisithupha okuhlasela kanye lamabili okudlwengula.
— Ubulembu.
Online Reporter