admin
Buhlebenkosi Gaule
ABALIMI besabelweni seMatabeleland bacele uMsekeli kaMphathintambo wogatsha lwe-Agriculture, Mechanisation and Irrigation Development okhangela ngezifuyo uKhomuredi Paddington Zhanda ukuthi kube lomthetho ozabavikela kwabezilaheni ukuze benelise ukuthola inzuzo nxa bethengisa izifuyo zabo.
Abalimi baveze lokhu emhlanganweni obuseCold Storage Company (CSC) koBulawayo ngoMgqibelo kuviki ephelileyo.
Abalimi baveze ukuthi bahlangana lenhlupho ezitshiyeneyo ekufuyeni izifuyo zabo ezigoqela imali, ukuzithengisa, ukuqhelisa isibaya kanye lokuguquka komumo womkhathi.
Omunye umlimi uveze ukuthi sebethwele nzima ngabezilaheni ngokubaqilibezela nxa bethenga inkomo zabo.
“Abanikazi bezilaha bathenga inkomo zethu ngemali ephansi okwenza sicine singatholi lutho kukanti siyabe sisebenzise imali enengi sizifuya.
“Kwezinye izikhathi njalo abezilaheni bayathatha inkomo zibe zinengi bacine besehluleka ukuzihlinza ngesikhathi esiyabe sivumelene ngaso. Lokhu kucina kubangela ukuthi sithwale nzima ukuthi sithengise izifuyo zethu,” kutsho umlimi lo.
UDokotela wezifuyo uJoseph Nyika uthe kumele kuguqulwe imithetho okumele ilandelwe nxa kuthengiswa inkomo ukuze kungabi lomunye oqilibezelwayo.
“Sicela kuguqulwe imithetho ukuze amalunga aphatheka ekuthengiseni lekuthengeni izifuyo asebenzelane kuhle kungabi lomunye oqilibezelwayo ngoba ngomthetho lo okhona khathesi abanye bacina beqilwa,” kutsho uDkt Nyika.
UMsekeli kaMphathintambo uZhanda uthe bazakhangelisisa ngezikhalazo zabalimi.
“Sizakhangelisisa ngezikhalazo ezibhekane labalimi sibone ukuthi kukhona yini esingakwenza njengoHulumende ukuze abantu bathengise njalo bathenge izifuyo ngenhliziyo ezimhlophe,” kutsho uKhmrd Zhanda.
Kumhlangano lo bekubuthane abantu abavela kunhlanganiso ezitshiyeneyo ezigoqela iZimbabwe Farmers Union (ZFU), iZimbabwe Commercial Farmers Union (ZCFU), iAgriculture Marketing Authority (AMA), abamabhutsha, abalungisa ukudla kwenkomo kanye lamapholisa.
Online Reporter