admin
YiNtatheli kaMthunywa
ICHICKEN Inn isiyehlukane labadlali abalodumo kumbali yenguqu uGuide Goddard loBhekimpilo ‘‘Bhakha’’ Ncube loba nje umqeqetshi uJoey Antipas ekuphika lokhu.
UAntipas uthe abalandeli babo bengakhathazeki ngoba ithimu yeChicken Inn eyadlala kumkhankaso weCaf Champions League ikhona, kodwa kuzamele akhiphe abadlali ababili.
“Bonke abadlali esasilabo kumidlalo yeChampions League bazadlala kodwa kulenkinga kwabanye. Mhlawumbe singakhipha ababili kumbe abathathu,” kutsho lumqeqetshi ekhuluma lentatheli.
UMthunywa uzwe ngabafakazi abaqotho ukuthi abadlali abangakhitshwa nguGoddard loNcube. Isizatho salokhu kucatshangelwa ukuthi umqeqetshi usefuna ukunikeza abadlali abasakhulayo kulisizini.
UGuide uqede isizini ka2015 engalugxobi enkundleni ngenxa yokulimala kwakhe kukanti uNcube ubeyivelakanci eqenjini loba nje ubetshibilika kuhle kumidlalo ayekhethwa kuyo. UNcube kusukela esadlala kuHighlanders ngo2014, ubehlutshwa lidolo.
Ebuzwa ngekusasa yabadlali laba, uAntipas uthe kuzalindwa ilanga langoMgqibelo lapho okuzakhulunywa ngethimu yakhe ka2016. Umhlaka 26 kulinyanga lilanga lokucina lokubhaliswa kwabadlali abakhethwe ngamathimu kuligi yeCastle PSL.
“Kunzima okwamanje ukuthi ngikhulume amabizo abadlali engibakhethileyo. Ngitshaywa likhanda ngoba bakhona abadlali abalamaphepha angalungisiswanga kakuhle.
“Abadlali bami baka2016 bazabikwa ngelanga lomhlaka 26 kuMbimbitho,” nguAntipas lo ebikela intatheli esemahofisini eChicken Inn ngoLwesithathu.
Unobhala wethimu uTavengwa Hara lelunga lebhodi elibona ngezemali uMlungisi Moyo bebekhona kulumbuthano.
Umqeqetshi lo walile ukuthi useyehlukane loGoddard loNcube wathi angeke avume kumbe ale.
“Sizamelela ilanga lapho engizakhupha khona umbiko ngethimu yami. Sisacabangisisa ngabadlali esilabo.”
Inyathelo lokuveza amabizo abadlali ngelanga lokucina lilakho ukulahlisa abadlali abangakhethwanga ngoba akusoke kube lelinye ithuba lokuthi badlale.
UAntipas uvike ngokuthi ukhulume lenkokheli ezibike ukuba sezilungisile ukuthi loba kungasuswa abadlali abathile abalesivumelwano leChicken Inn, bazabhadalwa kuze kuyefika uNhlangula.
IChicken Inn ivula isizini ngokudibana leDynamos ngempelaviki ezayo.
Online Reporter