adminSamkelo Tshuma
Umangoye uselala eziko emizini yabalingiswa bebhayisikopo Tsotsi the untold ghetto love story, nanko phela kubikwa lanxa sebenelise ukuthengisa amavidiyo (DVD) angu-4 000 kabakaphiwa ngitsho indibilitshi.
Iphephandaba likazulu lizwe ukuthi sekulabalingiswa abalitshumi asebefulathele kulandela ukwehluleka kwenkokheli ukubabhadala. UMthunywa uxhumane lomunye wabalingiswa okhethe ukungazakali ibizo oveze ukuthi uSimba Hillary Makaure ubasebenzisile kodwa wafumbatha imali yonke.
“UMakaure wasitshela ukuba sesenelise ukuthengisa amaDVD amanengi kodwa wehluleka ukusibhadala imali zethu. Kwakumele ukuthi sithole imali ngemva kokuba sethengisiwe laloba nje kwakungachazwanga ukuthi siza thola malini.”
Kuzwakale njalo ukuthi abanye abalingiswa sebethengisa amaDVD la emgwaqweni njengendlela yokuthola imali.
Ebuzwa ngalokhu uMakaure uthe kuliqiniso ukuthi kakabhadali abalingiswa.
“Imali yathathwa ngabantu engangibaqatshe ukuthi behambe bethengisa amavidiyo la ngoba sasingatholanga indawo yokubukisa kumabonakude. Kodwa ngiyathembisa ukuba izisebenzi lezi zizathola imali nxa singathengisa amanye amavidiyo eHarare ngoba sisalungisa uhambo lokuya khonale,” kutsho uMakaure.
Online Reporter