adminMsilisi Dube
KULENDODA ehlala eSinamusanga eBinga okubikwa ibulele ubhejane yamhlinza ngenhloso yokusebenzisa isikhumba sakhe ukuthabisa amadlozi ayo.
Umtshutshisi wecala leli uMnumzana Bruce Maphosa ubikele inkundla ukuba umsolwa uLeonard Mutale oleminyaka yokuzalwa engu-40 wathiya ubhejane lo ngocingo waze wambulala.
Kuzwakale ukuba mhlaka-18 kuyonale inyanga umsolwa waqonda emfuleni obizwa ngokuthi nguMafikili lapho afika khona wathiya inyamazana le wayibamba. Eseyibambile kubikwa umsolwa wahlinza inyamazana le qede lapho wathwala inyama yonke wayisa emzini wakhe.
Kubikwa umsolwa wathengisela izakhamizi leyo nyama okwabangela ukuba ezinye izakhamizi wazitshela ukuba inyama leyo ngeyenkomo. Izakhamizi lezo kubikwa zaqalisa ukumbuzisisa ukuba wayeyithethe ngaphi leyo nkomo njengoba wayetshaya inja ngekhanda.
Ezinye izakhamizi kubikwa zabika udaba emapholiseni okwabangela ukuba umsolwa abotshwe. Ebuzwa ngamapholisa umsolwa kubikwa wazama ukucatsha ngomunwe wathi ubulele inyamazana le ukuze athabise amadlozi akhe ngoba ayemlaye ukuba agqoke isikhumba saleyo nyamazana ukuze abe yinyanga eqinileyo.
Ekuthonisisweni kwecala leli ngumantshi uMmnumzana Stephen Ndlovu umsolwa ulivumile icala lakhe wathi wabulala inyamazana le ngoba efuna inyama.
“Nkosi indlala ingithwalise amagabha avuzayo. Njengoba ubona ukuba lezulu kalinanga kuhle lonyaka bengizama ukuziphilisa,” kuchaza umsolwa.
Ngemva kokuzwa ubufakazi lobu umantshi ugwebe umsolwa ukupika entolongweni okweminyaka emihlanu ngaphambi kokumesulela iminyaka emibili. Inyamazana le ibibiza amadola angu-$5 000.
Online Reporter