admin
Johas Moyo
ABAFUNDI abenza izifundo zeSayensi bakhuthazwa ukuthi benze izifundo zokuba ngomanjinela nanko phela sokuvele ukuba bayasilela kuleli.
Lokhu kuvezwe kumkhosi wokunikeza abafundi imivuzo ngaphansi kohlelo lweScience Technology Engineering and Mathematics (STEM) oluqhutshwa lugatsha lwezemfundo yaphezulu obukwenye ihotela yakoBulawayo ngeviki ephelileyo.
Ngenxa yokuthi abafundi abenza izifundo zeSayensi kuleli bebebalutshwana lokhu bekubangela ukuthi abafundele imisebenzi ethile basilelele kugoqela omanjinela.
Uhlelo lweSTEM luhlose ukwenza ukuthi kube labafundi abathe xaxa abenza izifundo zesayensi ukuze kuthuthukiswe ilizwe.
UMartin Manuhwa ongumgcinisihlalo kuEngineeering Council of Zimbabwe ubike ukuthi uhlupho lokusilela kwabomanjinela lubhahile kuleli kanye lakwamanye amazwe ngoba zinlutshwana izikolo ezilabantwana abaphumelelayo kulezo zifundo.
“Njengogatsha lwezefundo yaphezulu sikhuthaza abafundi ukuthi bathathe lezi zifundo zobucwephetshe ngoba kuyizo eziletha intuthuko elizweni. Phakathi kwabafundi abalobe imihloliso ye-Advanced Level kuzifundo zesayensi nyakenye kuphumelele abayisilinganiso esingange 13% okutsho ukuthi izinga lenthuthuko elikhangelelweyo elizweni lisakude ukufinyelela.
“Kudingeka inkokheli eziqinileyo njalo ezizwisisa ubucwephetshi obuhamba phambili ngezentuthuko.
“Kuyadanisa lokhu ngoba phezu kwalokhu abafundi abangamankazana abathakazelela lezizifundo balutshwana.
“Okumqoka yikuthi abantwana bafundiswe izifundo zeSayensi besesebancane ukuze bakhule bezithakazelela njengabantwana bakwamanye amazwe asethuthukile,” kutsho uMnu Manuhwa.
Uqhubekele phambili njalo ekhuthaza abezemfundo ukuthi baqakathekise ukwakha izindawo ezifaneleyo zokuthi abantwana bafundele izifundo zeSayensi okuzakwenza kube labafundi Abanengi abenza lezizifundo.
“Kumbiko evezwe ngenye inhlanganiso ebona ngezamanani (statistics,) amazwe afana leZimbabwe, Namibia kanye leTanzania umanjinela oyedwa uyabe efanele esize abantu abangu-6 000 kukanti kwele China umanjinela oyedwa umela abantu abangu-200, lokhu kuveza ukuthi amazwe e-Africa asasemuva ngezifundo zobucwephetshi,” kutsho uMnu Manuhwa.
Online Reporter