admin
Buhlebenkosi Gaule
INHLANGANISO yeOrganisation for Rural Associations for Progress (ORAP) isikhuthaze abalimi ukuba badibhise imbuzi zabo ngoba lokhu kuqakathekile ikakhulu kulabo abalimi abazifuyela ukuthengisa.
UMnumzana Thabiso Dube onguMonitoring and Evaluation Coordinator ku-ORAP ekhuluma esesitandeni salinhlanganiso kumbukiso weZimbabwe International Trade Fair (ZITF) ngeviki ephelileyo uchaze ukuba abalimi abanengi abakuqakathekisi ukudibhisa imbuzi ngoba bekubona kungaqakathekanga.
“Imbuzi lazo ziqakathekile njengesifuyo esilakho ukuletha imali kumlimi ozifuyileyo kungakho-ke kuqakathekile ukuthi lazo zidijiswe. Imbuzi ezidijiswayo ziloboya obucazimulayo njalo azilayo imikhaza okutshengisa ukuthi ziyabe ziphilile ngempela.
“Njengenhlanganiso sifisa ukuba abalimi babekwazi ukuba imbuzi lazo ziyakudinga ukudijiswa njalo lokhu kuqakathekile ikakhulu kubalimi abafuya imbuzi zabo ngenhloso yokuzithengisa,” ngamazwi kaMnu Dube la.
UMnu Dube uthe kulezigaba lapha abancedisa khona abalimi ukuba bakhe amadibha kodwa ezindaweni ezitshiyeneyo kumele abalimi babe ngabantu abazimiseleyo okokuthi bayahlanganisa imali zabo bazakhele awabo amadibha embuzi.
“Abalimi abazimiseleyo ukuphumelela ekufuyeni kwabo imbuzi balakho ukuvumelana batshaye izimali bazakhele awabo amadibha okulakho ukubenza bathole imali enhle nxa sebethengisa imbuzi zabo,” nguMnu Dube lo.
Uphethe ngokuthi sokumele abalimi babone ukuqakatheka kwembuzi njengesifuyo esilakho ukuletha imali kumlimi ngokunjalo baphange bakhele imbuzi amadibha ukuze zihlale zingeziphilileyo.
Online Reporter