Online Reporter
Lovemore Dube
ABAPHATHI bezomdlalo wokugijima ezikolo zakoBulawayo babika ukuba bayasuthiseka ngezinga lokugijima elitshengiswe ngabafundi akade bencintisa kumqhudelwano weWafawafa eWhite City.
Umgcinisihlalo wezokugijima kuNational Association of Secondary School Heads (Nash) koBulawayo uCain Ncube uthe okubathokozisa kakhulu yikubona abafundi bencintisa kuhle lezinye intshantshu zakwezinye izabelo.
Umqhudelwano lo, ubuphethwe yinhlanganiso yeNational Athletics Association of Zimbabwe.
UNcube ubukele omunye wabafundi bakoBulawayo ethola ithuba lokubonakala enkundleni, okuzamnikeza ukuzethemba nxa esesiyancintisa kweminye imincintiswano.
“Silethemba elikhulu ukuthi ngokwezinga esilibonileyo lapha, sizakhetha abadlali abalethalenta eliphezulu kakhulu,” kutsho uNcube, esengeza ngokuthi izikolo ezibalisa iMagwegwe, Riverdale, Sobukhazi, Lobengula kunye leNorthlea bezikhona kulumcimbi.
Kusenjalo, isikolo seMagwegwe High sihambe phambili kumncintiswano wezikolo ezingaphansi kwesigaba seMzilikazi District.
Bekugcwele phamu ngoLwesithathu enkundleni yeWhite City, kubukele abantwana besikolo, abazali lamanye amalunga omphakathi.
Isikolo seMagwegwe High sikhokhele kulogu yemendulo njalo kukhangelelwe ukuthi sibe labantwana abanengi abazangena eqenjini elizancintisa kuzigaba zakoBulawayo kumaviki amabili azayo.
Kusiyafika isikhathi sokudla kwemini, iMagwegwe ibilememdulo ezingu-38 ezigoqela igolide (22), isiliva (12) lethusi (5). Ngaleso isikhathi iMpopoma High ibisondela ilemendulo ezingu-45 (14 igolide, 20 isiliva le 11 ithusi).
IMsitheli High ibilandela ilemendulo ezingu-26. Isikolo seNkanyisweni ebesiqala ukuncintisa, besithwele nzima.
Izikolo ezincintisa ngaphansi kweMzilikazi District yiHlathi, Mpopoma, Mandwandwe, Magwegwe, Sikhulile, Msitheli, Enkanyisweni, Njube, Lobengula, Sizane leNkulumane.
