adminLungile Moyo
INHLANGANISO yeSelf Help Development Foundation koBulawayo iqhubekela phambili ngokuthuthukisa omama ngemisebenzi yezandla etshiyeneyo ukuze bathole inzuzo yemali.
UMthunywa uxoxisane lo-administrator wenhlanganiso le, uNkosikazi Stella Mukombwe obike ukuthi inhlanganiso le yasungulwa ukuze iphakamise njalo ithuthukise omama ngemisebenzi yezandla egoqela ukuthunga izigqoko, ukuluka inwele, ukupheka, ukwenza izicathulo, ukuthunga ngelala kanye lokutshayelana izimali.
UNkkz Mukombwe uthe inhlanganiso yabo ihlose ukuthi omama bangenza imisebenzi le yezandla bathuthuke bacine sebengosomabhizimusi.
Wengezelele wathi omama nxa sebefundisiwe imisebenzi yezandla bayahlangana babe ngamaqembu kusiya ngendawo abahlala kuzo baqalise ukwenza imali ngalokho abayabe bekufundisiwe.
“Sikhangelele ukuthi omama nxa sebefundisiwe imisebenzi ethile abangazenzela yona babumbe amaqembu kusiya ngokuthi bahlala ngaphi baqale ukwenza amaphurojekithi azabalethela imali,” kutsho uNkszn Mukombwe.
UNkszn Mukombwe uthe ukufunda akupheli, njalo abesifazana kumele badinge ulwazi kulabo abalolwazi ukuze benelise ukuzincedisa.
“Omama kumele babekwazi ukuthi baqakathekile njalo bangenza ngcono, ngakho ngiyabakhuthaza ukuthi bakhuthale njalo babe semaqenjini amancane bathole ulwazi ukuze benelise ukuphatha imisebenzi engabancedisa empilweni.
“Lokhu kuzenza benelise ukuziqhatsha ukuze babelesithunzi njalo benelise ukusilela imuli zabo,” kuxwayisa uNkszn Mukombwe.
Inhlanganiso yeSelf Help Development Foundation yasungulwa nguMnumzana Francis Fadelove ngo1963 eMhondoro esenanzelele ukuthi omama ngabantu ababeswele okokwenza njalo bebehlala emakhaya belenswelo ezithile, ngakho wasebuya lombono wokuthuthukisa omama lamantombazana ukuze benelise ukuziphilisa.
Sikhuluma nje linhlanganiso itshengisa ingqubekela phambili ngoba isilengatsha endaweni ezehlukeneyo kuleli.
“iSHDF ilengatsha ezinengi emadolobheni amanengi agoqela iGweru,Gwanda, Lupane, Plumtree,” kutsho uNkszn Mukombwe.
Online Reporter