Online Reporter
Nkosilathi Sibanda
ABALANDELI beHighlanders abahlala eHwange lakwezinye indawo esabelweni seMatabeleland North balinde ngabomvu ukubukela iqembu labo linyathela enkundleni yeColliery ngemva kwesikhathi eside balicina kulindawo.
Inengi ebelisehluleka ukubukela leliqembu eBarbourfields, lizakholisa ngoMgqibelo kumdlalo wenkezo yeMunhumutapa Round of 32 leBlackrock.
IBlackrock liqembu elikuSouthern Region Division One.
Ukuza kweBosso, eHwange izodlala leqembu leli sekwenze lumdlalo wabamkhulu ngoba kuyavela ukuthi kuza kuba lokwehlukana kwabalandeli kulindawo, nanko phela iBlackrock ngeyeHwange. Kuyaziwa ukuthi bakhona abasekela iBlackrock ngesikhathi sinye besekela leHighlanders.
Ngakolunye uhlangothi, iHighlanders kaBenjani Mwaruwari ingena kulumdlalo iyintandokazi ngenxa yobungcitshi lokuba lethalenta elikhulu, kodwa imidlalo yenkezo isike yabonisa ukuthi amaqembu amancane ayenelisa ukumangalisa amaqembu amakhulu.
Omunye umsekeli omkhulu weHighlanders ohlala eHwange, uMoses “Maraha” Nkomo uthe inhliziyo yakhe ikuHighlanders.
“Kwaze kwakuhle ukuthi iqembu lethu lifike eHwange ngemva kwesikhathi eside. Sizayisekela ngenhliziyo, njengalokho esikwenza maviki wonke loba singenelisi ukungena umango ukuyayibukela kwezinye inkundla. Siphuma lemiklomelo yonke kulumdlalo,” kutsho uNkomo.
UQinisani “Dr Truth” Ncube, oyisimbamgodi samalahle eHwange, utshele iphephandaba likazulu ukuthi impelaviki ezayo izaletha okukhulu.
“Ngesikhathi iHighlanders icina ukuza lapha, idolobho lethu laliphansi ngengqubekela phambili. Khathesi liza lapho lathi sesitshintshe kakhulu. Sesibanengi abasekela iqembu eHwange. Yikho libona maviki wonke kusiba labalandeli abasuka lapha beqonde eBarbourfields lanxa iqembu lisekhaya. Sizakwenza lokhu eColliery, sitshengise ukuthi iBosso yithimu Yezwe Lonke,” nguNcube lo.
Kusenjalo, iBlack Rock, isilungiselele ukwenza isimanga kumdlalo wayo leBosso.
Umdlalo lo uthathwa njengomkhulu kakhulu embalini yeBlack Rock njengoba izathola ithuba lokuzama amandla ayo lelinye lamaqembu amakhulu elizweni.
Umqeqetshi weBlack Rock, uTinashe Doriro, uthe abadlali bakhe bagcwele injabulo njalo kabafuni ukwethuswa libizo leHighlanders.
“Sijabule kakhulu. Leli lithuba elikhulu eqenjini lethu lokudlala leqembu lePremier Soccer League njalo elinye lamaqembu amakhulu eZimbabwe. Sizimisele ukubonisa ukuthi lathi silakho ukudlala ibhola elihle,” kutsho uDoriro.
Uthe iqembu lakhe lilabadlali abasakhulayo njalo lumdlalo ungaguqula impilo yabo.
“Inengi labafana laba alikaze lithole ithuba elinje. Sibatshele ukuthi ngumdlalo njengeminye yonke. Nxa bengadlala kuhle bangatshintsha ikusasa labo ngoba umdlalo lo ungabavulela indlela yokungena kumaqembu amakhulu.
Siyayihlonipha iHighlanders kodwa sizadlala ngendlela yethu, sidinge ukunqoba.”
Abalandeli bebhola eHwange bakhangelelwe ukugcwalisa iColliery njengoba iBlack Rock izafuna ukusebenzisa inzuzo yokudlalela ekhaya, kuthi iBosso yona izimisele ukuvimba ukukhitshwa liqembu elidlala kuDivision One.
