Online Reporter
YiNtatheli kaMthunywa
UGATSHA lwePrimary and Secondary Education kuHulumende, esigabeni seBulilima eMatabeleland South seluhlele ukuthi lujezise bonke ababalisi abaphuma le-zero phesenti kumihloliso.
Kubikwa kuzakhangelwa ababalisi labo asebeqede iminyaka emihlanu belokhe besehluleka ukuthi bakhiphe impumela engcono kubafundi, ikakhulu kuzifundo zeHeritage Studies, Geography, Combined Science leMathematics.
Kumbiko othunyelwe abaphathi bezikolo eBulilima, umhloli omkhulu wezikolo kulesi isigaba, uMnumzana Gobile Gobile uthe kuminyaka emihlanu edluleyo, sekube lababalisi abedlula itshumi lanhlanu abehluleke ukufundisa abantwana baphumelele emihlolisweni yeZimbabwe Schools Examinations Council.
Baphathi bezikolo, bengicela lingiphe impumela yemihloliso yaphakathi komnyaka evela kubabalisi abafundisa izifundo ezilandelayo.
Kulezikolo esizikhangeleyo esezikhiphe i-zero percent pass rate kuminyaka emihlanu edluleyo ezibalisa iZenzele (Heritage Studies; Geography; Combined Science; Mathematics), Ntunungwe (Mathematics), Mzwanyana (Agriculture; Commerce; English; Combined Science), Mazwaligwe (Agriculture; Geography), Maqhekeni (Mathematics), Madlambudzi (Combined Science), Himago (Mathematics), Matjinge (Mathematics) leSiyaphambili (Mathematics), kutsho uMnu Gobile.
Uqhubeke wathi: Abaphathi bezikolo eziqanjwe phezulu kumele bakhangelisise, bahlole amaphepha lapho abafundi abakade beloba khona imihloliso. Nxa kuzakuba lombalisi ozakhipha i-zero percent lonyaka, uzajeziswa ngoba uyabe ehluleke umsebenzi. Ukwehluleka ukufundisa abantwana ngeke kwamukeleke.
