admin
NguMsilisi Dube
NJENGOBA insuku zokulotshwa kwemihloliso kaNhlangula isisondele abazali sebecetshiswe ukuthi bakhuthaze abantwababo ukubala ukuze bathole imiklomelo emihle.
Abazali abanengi bayadana kakhulu nxa abantwababo bengasenzanga kuhle emihlolisweni yabo kodwa bengazange bake bahlale labo phansi babakhuthaze ngokuqakatheka kokuzinikela ezifundweni zabo.
Linkuthazo ivele kuMnumzana Dan Moyo onguMqondisi wezemfundo koBulawayo.
“Ungananzelela abazali bayona abantwababo ngokubathengela omakhalekhukhwini abangena kuWhatsApp kulokuthi babakhuthaze ukuthi babale. Abanye abantwana batshonela ukubuka omabonakude kuphela.
“Umzali ohlakaniphileyo kumele ahlale lomntanakhe phansi amtshele ngokuqakatheka kokufunda aphinde amncedise nxa esenelisa ezifundweni zakhe,” kuchaza uMnu Moyo.
UMnu Moyo uqhubekele phambili wathi impilo yalamuhla ifuna umuntu ofundileyo njalo okhaliphileyo.
“Imfundo yiyo eyenza umuntu aphumelele. Abanye abazali kabakabhadaleli abantwana imali zesikolo lokhu akulunganga ngoba umntwana uyabe engasahlalisekanga kuhle phakathi kwabanye abafundi njalo kumenza angaqakathekisi umsebenzi wesikolo.
“Njengoba izikolo sezivuliwe, umlandu womzali yikupha usekelo olwaneleyo emntwaneni ukuze laye azizwe engumuntu phakathi kwabanye abantwana.
“Umzali kumele abone njalo ukuthi umntwana ugqoke njengabanye abantwana njalo alandelele umntanakhe ambuze ukuba ufundeni malanga wonke, amncedise lapho asilela khona,” kuchaza uMnu Moyo.
Umntwana wesikolo kubikwa laye kumele azinuke amakhwapha akhangele ukuthi yena ungubani, uvela ngaphi, uyaphi njalo ufisani empilweni yakhe.
Online Reporter