Online Reporter
ZISELE zidabukile izakhamizi zeThokoza, Ekurhuleni, eSouth Africa kulandela ukungcwaba amawele uMpho loMphonyana Lekeka abagalula eBrits Dam kumaviki asanda kwedlula.
Ngokubika kwamaphephandaba, uMpho loMphonyana Lekeka, bobabili ababelaleminyaka engu-40, balahlekelwa yimpilo ngoLwesine, mhlaka 27 Ncwabakazi 2026. Amawele la ayelabangane ababili ngesikhathi kusenzakala ingozi, njalo bona basinda basebetshela amalunga omphakathi lamapholisa ngokwasokwenzakele.
Isehlakalo lesi sitshiye imuli lomphakathi esizini, ikakhulu ngesikhathi kusabalala amahungahunga ezinkundleni zokuxhumana mayelana lokwenzakala okwabangela ukufa kwabo.
Ezinsukwini ezalandela lesi sehlakalo esibuhlungu, kwasabalala inkulumo ezinkundleni zokuxhumana zisithi kungenzeka ukuthi lamawele agalula ngesikhathi esenza amasiko athile. Imuli yabo iwachithile amahungahunga la ngokupheleleyo, isithi zibuhlungu njalo zingamanga.
Umzawabo, uThabo Lekake, uthe amahungahunga la engezelele ubuhlungu obabusibekele imuli ngesikhathi esibuhlungu kangaka.
“BabengamaKhristu, njalo abantu kumele bayekele ukusabalalisa amanga la ngoba alimaza abantwana babo,” kutsho imuli.
Izihlobo zichaze amawele la njengabaculi labathokozisa abantu ababedume emphakathini, njalo ababevame ukuvakashela eBrits Dam lapho ababehlangana khona labanye abantu bezozilibazisa.
“Mayelana lokwenzakeleyo ngalelolanga, asikwazi kuhle ukuthi kwenzakalani, kodwa sizawutshiya umsebenzi lo usezandleni zamapholisa,” kutsho uLekeka.
Usodolobho weEkurhuleni, uNkosindiphile Xhakaza, wavakatshela imuli yakoLekeka, ukuyedlulisa amazwi enduduzo mathupha.
Ukuvakatshelwa lokhu kwenzakale ngesikhathi umphakathi usazama ukwamukela ukulahlekelwa ngabesilisa ababili ababedume kakhulu endimeni yezokuzilibazisa emphakathini.
Amapholisa aqinisekise ukuthi uphenyo ngokugalula kwabo luyaqhubeka. Akukakhitshwa eminye imininingwane mayelana lokwabangela ukufa kwabo. Imuli icele umphakathi ukuthi uyinike ithuba lokulila ngokuthula, yakhuthaza abantu ukuthi bayekele ukusabalalisa imibiko engakaqinisekiswanga engabangela obunye ubuhlungu, ikakhulu ebantwaneni bala mawele.
Amawele la abekwe ngeSonto eledluleyo njalo kubikwa angcwatshwe phakathi kwengcwaba elifanayo.
Bekuyisehlakalo esibuhlungu ukubona abantu ababili abazalwa bonke bengcwatshwa ngasikhathi sinye.
Ibhokisi likaMpho kubikwa yilo eliqale ukubekwa phakathi kwengcwaba kwathi elomunye wakhe uMphonyana lalo lafakwa ngaphezu kwelakhe.
Elinye ilunga lemuli elingathandanga ukuqanjwa ngebizo lithe ukulahlekelwa ngamawele la kutshiye isikhala esikhulu emulini.
Amaqele ebesanda kucindezela ingoma yazo ebizwa ngokuthi Duduzile njalo bebelenhlelo ezimangalisayo.
“Kusizwise ubuhlungu ukulahlekelwa yibo ngasikhathi sinye. Bebelenhlelo ezimangalisayo ikakhulu kwezomculo leqembu labo elibizwa ngokuthi Yoz,” utsho njalo.-Daily Sun
