Online Reporter
Nkosilathi Sibanda
IKHANSILI yakoBulawayo ithi ngeke ibuyele muva kuhlelo lwayo lokuhlanza idolobho, njalo izasusa bonke abathengisela emkambo osemgwaqweni ka-5th Avenue.
Emkambo lo kuthengiswa imbhida, amatamatisi, amagwili, izithelo lokunye okutshiyeneyo. Ngokunanzelela ukungcola osekukhona kulindawo, ikhansili isicabange ukuthi isuse abathengisayo ukuze kulondolozwe ukuhlanzeka, ukuphakanyiswa kwamabhizimusi lokuvikela umphakathi emikhuhlaneni.
Kumbiko owethulwe ngunobhala wekhansili uMnumzana Christopher Dube, kubikwa kuzacubungulwa amacebo azalandelwa ekususweni kwabathengisayo. Uthe bazasuswa ku-5th Avenue, benikwa indawo emkambo omutsha koBhakta’s laseGodini Mall, lapho okulezitanda ezingu-350.
“Idolobho lakoBulawayo khathesi lixoxisana lenhlanganiso ezitshiyeneyo mayelana lokususwa kwabaphila ngokuthengisa besuka ku5th Avenue besiya eBhakta’s leGodini Mall.
“Ukususwa ku-5th Avenue kuphambili njalo idolobho lisaqhubeka lalezi ingxoxo lengatsha ezitshiyeneyo. Idolobho likhumbuza izakhamizi nge-SI 220 ka-2023, ethi, inqola ezifuqwayo ngeke zivunyelwe enzinkini yedolobho kusukela ku-3rd Avenue, Lobengula Street, 12th Avenue kunye loRobert Mugabe Way,” kutsho umbiko lo.
Kubikwa njalo ukuba amachence okuthengiswa lokwabelwa kwendawo zokuthengisa, kuzaphiwa kulabo abathola amachence la ngomnyaka odluleyo.
