Online Reporter
Bhekimpilo Tshalibe
Umhlabeleli we-rhumba odabuka eTsholotsho, uDesire Mlungisi Ncube, ukhangelelwe ukuthi akhiphe idlalade elitsha elivutha amalangabi, mhlaka 5 kuyonale inyanga.
Idlalade leli elilesihloko esithi Inkambi zikaFaro.
Ekhuluma lentatheli, umhlabeleli lo owaziwa kakhulu ngelithi “King Garia” uthe waqalisa ukuhlabela ngonyaka ka 2021.
“Ngaqalisa ukuhlabela ngomnyaka ka 2021 njalo ngakhipha ingoma yami yakuqala elesihloko esithi Amanxeba,” utsho njalo.
Uthe okwamenza waqalisa ukuhlabela yikuthi wakhula ethanda ukulalela umculo we-rhumba.
“Okwangenza ngaqalisa ukuhlabela yikuthi ngikhule ngingumuntu othanda ukulalela umculo we-rhumba njalo ngaze ngaqala elami iqembu okuthiwa yiMbube (isicathamiya) njalo ngangizizwa ngijabula kakhulu nxa ngihlabela, yikho engabona khona ukuthi isiphiwo sami sisekuhlabeleni,” kutsho uKing Garia.
Ubuye waveza ukuthi lokhe waqalisaukuhlabela uselengoma ezintathu.
“Lokhe ngaqalisa ukuhlabela sengahwatsha ingoma ezintathu ezigoqela ethi Amanxeba njalo le ngayikhipha ngo-2021. Ngakhipha njalo ethi Ixhiba kanye lethi Itoyitoyi njalo lezi zombili ngazikhipha ngo 2021, ngenyanga kaMpalakazi,” kutsho uKing Garia.
Uthe mhlaka 5 uzahwatsha idlalale elitsha elilesihloko esithi, Inkambi zikaFaro.
“Mhlaka 5 kuyonale inyanga ngizakhipha idlalade elitsha elilesihloko esithi Inkambi zikaFaro njalo lizabe lilengoma ezingu- 6,” kutsho uKing Garia.
Uthe idlalade lakhe limumethe izixwayiso ikakhulu kuntsha.
“Idlalade leli lilezixwayiso ikakhulu ebantwini abasakhulayo njalo liphinde likhuthaze uthando ebantwini.
“Ingoma zami zizabe zitholakala kuma USB kanye lakuma disc,” kuphetha uKing Garia.
