adminEthel Ncube.
INKAMPANI yeKens Entertainment ephathisa abahlabeleli bakuleli ukucindezela umculo wabo ikuleli ngenhloso yokufundisa abahlabeleli ngomculo.
Inkampani le eyasungulwa ngomnyaka ka2002 eDurban kweleSouth Africa isincedise abahlabeleli abanengi ukucindezela ingoma zabo.
Abakhokheli benkampani le uNqobizitha Kenneth Ncube loAngello Khumalo sebenxuse abahlabeleli bakuleli ukuthi bahlanganyele labo ukuze bakhulise umculo wakuleli.
Injongo yenkampani le yikuthi ingoma ezizacindezelwa zihanjiswe kweleSouth Africa njengendlela yokuthi abahlabeleli laba baziwe.
UNcube ubikele iphephandaba likazulu ukuba balesitudiyo njalo bazimisele ukuphathisa abahlabeleli bakuleli ukuze ngesikhathi bebuyela bayebathengisela amadlalade abo khonale.
“Sidinga abahlabeleli balapha ikakhulu abangenelisi ukucindezela ingoma zabo ukuba baze sibaphathise ukuze umculo wabo ungapheleli emoyeni kodwa wazakale kwezinye indawo,’’ kulandisa uNcube.
Uqhubekele phambili wachaza ukuba amalunga enkampani yabo lawo angabahlabeleli njalo balentshukuntshu yokuphathisa abanye abahlabeleli.
Wengezelele wathi basebenzelana labemisakazo kwele South Africa kungakho-ke bayenelisa ukuphathisa abahlabeleli ukuthi umculo wabo utshaywe kurediyo,’’ kuphetha uNcube.
Online Reporter