Online Reporter
Lovemore Dube
UJAHA we-200m uTapiwanashe Makarawu osethethe ezokugijima ngodumo lomunye wakhe uMakanakaishe Charamba sebengenza izimanga ezikuzinga eliphezulu kumdlalo lo ngemva kokuqala umnyaka ngomfutho.
Amajaha la afunda kweleMelika njalo aphatheka kwezokugijima bemele amakolitshi abo baqhubeka bezibeka emlonyeni yabantu umhlaba wonke ngezikhathi ezikhwabithekayo abazigijimayo.
Kumnyaka odluleyo benelise ukufika kunombolo yesitshiya galombili kumidlalo yeOlympics eyenzelwa eParis. Babangabaqali besiziba ekubeni babili kubanga lelo bemele iZimbabwe ku-200m.
Ngaphambilini bekuloBrian Dzingai loNgoni Makusha ababefike kumidlalo yokucina kuma-Olympics. UMakarawu kumnyaka odluleyo ubengowokuqala ukugijima i200m ngaphansi kwesikhathi se-20 seconds.
Lokho kwasuka kwabayiyo i-national record kuyisikhathi se-19,94 seconds kukanti uCharamba wathi angeke asalela emuva wagijima i-19,95.
Nxa kwakuyikuwela okuka2024, lonyaka batshengisele ukuthi bangabalelwa phezulu labanengi ngokugijima isikhathi esifanayo esiyiso esibephezulu lonyaka ku-Indoor 200m ese-20,13 seconds.
Lokhu sekubenze baba ngabagijimayo asebevulelwe amehlo ngumhlaba wonke.
Kwangani kuyahlola ngoLwesihlanu olwedluleyo lapho ekugqibeni imidlalo yeNCAA Division One okungumbuthwano wabagijimela amanyuvesi aphezulu eMelika, uMakarawu waphuma umchilo kusikhathi se-19,84 seconds, osekuyi-national record.
UCharamba laye wabaseduzane nge-19,92 seconds.
Izikhathi zabo zinhle kakhulu okokuthi zibavulele indlela yokuthi bayegijima labo kumaWorld Championships eJapan kunyanga ezimbili ezizayo.
Bebevele benelisile ukubalelwa kwabahambayo ngezikhathi abazigijima kumnyaka odluleyo.
UKhumbulani Dube, oqeqetsha iNational University of Science and Technology uthe kuhle okubona amajaha la encintisane labomhlaba wonke kuzinga eliphezulu.
Uthe bangala begijima ngalindlela bazazivulela amathuba amahle.
UDube uthe akuvamanga ukubona abagijimayo abavela kulizwe linye abangasibo beMelika kumbe entshonalanga yeAfrica bephuma bebelethene kumaNCAA Finals.
“Nxa bengalolongeka ngcono, zinengi izimanga abangasazenza laba bobalili,” kutsho uDube.
I-Zimbabwe isike yaba labagijimayo abanjengoTendai Chimusasa, Julia Sakala, Magret Mahohoma, Sharon Tavengwa, Kasirayi Sita, Tendai Chinhanu, Ken Harden, Arnold Payne, Stanley Mandebele, Cuthbert Nyasango loAbel Chimukoko abanqobe kumidlalo ngaphandle kwelizwe.
