Online Reporter
Siphathokuhle Ngulube
Salibonani bafundi. Ngithemba liqhuba kahle izifundo zenu njalo liqhuba kahle izichwayisiso zenu. Sikhumbule phela bafundi ukuthi nxa uchwayisisa udinga ulwazi olufihlakeleyo kanti futhi ekucineni kwakho konke kufanele kuphume isisombuluko. Konke lokhu bafundi kutsho ukuthi lisebenze nzima ukuze liphume lezichwayisiso ezilomsoco njalo ezizaba lusizo kumphakathi nje jikelele.
Ngeviki ephelileyo sixoxe ngesigaba sesibili sezichwayisiso zethu. Ngithemba sikubambile ukuthi kulesi isigaba sidinga kakhulu ulwazi oluhambelana lezihloko zethu. Sitshilo ukuthi ulwazi singaluthola ebulenjini, ezingwalweni, emsakazweni, ekuxoxisaneni labanye lakwezinye nje izindawo ezinengi esingaziqamba. Okumele sikunanzelele bafundi yikuthi kuzo zonke lezi izindawo engiziqambileyo awuthathi konke kodwa uyahluza okuyikho okuhambelana lesakho isihloko.
Asithi uchwayisisa ngezindlela zokulondoloza ukudla esintwini. Kwezinye izingwalo kuyalandiswa nje ngokudla jikelele. Wena ke sekumele udinge okuyikho okuhambelana lesakho isihloko. Okunye njalo esikhulume ngakho okuqakathekileyo kusigaba sesibili yikuba ukhangele ubuye uchwayisise ngezixazululo zengxaki okhuluma ngayo esezivele zikhona phambilini. Kuyini osekwenziwe ngabanye kumbe ngezinye izinhlanganiso zizama ukuxazulula ingxaki lawe oyibonayo.
Ngeviki ephelileyo sitshilo ukuba nxa ukhangela ngokweyiswa kwabelaphi besintwini kanye lemithi yabo ungakhangela ukuthi kanti izinhlanganiso ezinjengaboZINATHA zona sezenzeni. Zikhona futhi ezinye izinhlanganiso (Herbal Doctors Association) lazo zikhuthaza ukusetshenziswa kwemithi yesiNtu esilazo ezindaweni zethu hatshi le eyesikhiwa. Sungakhangela ke uhluze imisebenzi yalezi zinhlanganiso kanye lemizamo asebeyenzile. Konke lokhu ozakukhangela lapha osukubone njengendlela yokuxazulula ingxaki, uyakuthatha uhambe lakho kusigaba sesithathu.
Lapha kulesi isigaba, usukhangela ubuhle lobubi balezi izindlela uhluza kabanzi. Kukhangelelwe ukuba uveze ubuhle kumbe ububi utsho ngokugcweleyo ukuba uthi kuhle ngani kumbe kubi ngani. Asithi ukhangele izinyanga lemithi yezolo. Asithi utshilo ukuthi zikhona izinhlanganiso ezizimisele ukukhuthaza lokumela izinyanga kanye lemithi yesiNtu. Sekumele utsho ke ukuthi iZINATHA le inhle ngani? Usungatsho phela ukuthi imela wonke umuntu oyinyanga yezolo kanti futhi osebenza ngemithi yesiNtu okwenza ukuthi kungabi lokuganga ebantwini bacine besebenzisa imithi engayisiyo.
