Online Reporter
Nkosilathi Sibanda
IMPILO yezibotshwa zakuleli iqhubeka isibangcono mihla lamalanga njalo inengi lazo libika ukuthi mhla liphuma, lifisa ukuguqula impilo zazo.
Kube yinkulumo ephume kuzibotshwa ezinengi ngesikhathi zivakatshelwe yizihlobo labangane kuhlelo lweFamily Week obeluqhutshwa ngabeZimbabwe Prisons and Correctional Services (ZPCS) ngeviki edluleyo, kusukela mhlaka 28 Mabasa kusiya ku 4 Nkwenkwezi.
Uhlelo lolu lwenzelwa ukuthi izibotshwa zithole isikhathi sokuthi zixoxe lezihlobo labangane okwamahola ayisithupha emagcekeni emajele wonke akuleli.
Uhlelo lolu luqhutshwa ngesikhathi sekhefu lezikolo, kuhloswe ukuthi labantwana babe lethuba lokubona oyise, abanewabo, odadewabo labomama abasemajele.
Iphephandaba likazulu livakatshele ejele yeBulawayo Prison ngeSonto edluleyo lapho elibone ukuqakatheka kokuhlangana komdeni. Abanye bafike bahlengezela inyembezi zothando bebona izihlobo abakade bazicina.
Bekumnandi, kuqhunswa irediyo izibotshwa zitshengisa ubugabazi bazo esitikini.
Kudliwe izibiliboco, kwadliwa ugazana kwanathwa amanamunede, kwaba kuhle.
Omunye wezibotshwa, uthe ukubona umkakhe kumenze wakhululeka.
“Ngijabule kakhulu ngibona intombi yami. Ngayicina mzwana ngigwetshwa. Ngiyabonga kubaphathi bethu lapha ngethuba leli. Ejele sihlezi kuhle. Loba singatholi konke esingabe sikufisa, kodwa impilo yethu isezandleni ezifudumalayo.
“Ngizathi ngiphuma lapha ngiyeqedisa izifundo zami zokubaza. Ngithola imfundiso lensindiso. Impilo yomuntu iyaguquka lapha,” kutsho lesi isibotshwa esagwetshelwa ukutshontsha.
I-ZPCS izimisele ukuthi ligcine izibotshwa, ziguqulwe ingqondo ziphile impilo elokuphepha lempumelelo.
Ngokunjalo, u-Officer Commanding weZPCS esabelweni sakoBulawayo uMkhulunyelwa Ngwenya wazise intatheli ukuba iFamily Week incedisa izibotshwa ukuthi zenelise ukucabangisisa ngempilo zazo, zithole ithuba lokuthi zizihlole kungela kukhathazeka enhliziyweni.
“Usekelo lwemuli luqakatheke kakhulu kuzibotshwa ngoba kubatshengisa ukuthi bayathandwa zimuli zabo. Kubalulekile ukuthi izibotshwa zihlale zixoxa lamalunga omdeni lokuthi zihlale zikwazi okwenzakala phandle, ukuze zilungiselele mhla ziphuma ejele,” nguComm Ngwenya lo.
Ngendlela yokuncedisa izibotshwa ukuthi zilungiselele impilo seziphume ejele, iZPCS iphinda njalo iqhube inhlelo zokukhuthaza ukufundela imisebenzi yezandla ebalisela ukuthunga, ukugela, ukubaza, ukulima, ukulungisa izimota leminye ephathisa empilweni.
Kwezemidlalo izibotshwa ziphatheka kunguqu, ukuqaga, volleyball, chess lama-darts.
