adminCornelius Luphahla
KAZILAMATHE izakhamizi zesigabeni sakoPhulula eLupane ngenxa ye-trailer yegonyethi ekule indawo okubikwa isibaqedile abantu abayithintayo ngokubatshaya ngamampama.
I-trailer le yawela emgelweni eceleni komgwaqo osuka koBulawayo usiya eFolosi.
Kubikwa umuntu angavele ayithinte i-trailer le uzwa ngempama esihlathini ahle awele phansi.
Kuzwakale ukuthi i-trailer le yatshiywa ngeyinye igonyethi yeZambia ethiwa yiZalawi ngo2010 lezipanela phakathi kanye lezinye insimbi ngemva kwengozi yokuthuzana lebhasi kodwa sokuze kulamuhla zingathathwanga muntu.
UMthunywa ukhulumisane loMnumzana Liberty Moyo oyisakhamuzi kule indawo wathi i-trailer le isitshaye abantu abanengi bezama ukutshontsha insimbi ezikulo kodwa kabalimali.
“I-trailer le yanyomuka egonyethini ngemva kokuthuzana kwayo lebhasi uBravo yayawela emgelweni oseceleni komgwaqo. Umtshayeli wegonyethi wayitshiya khonapho lezipanela ezaziphakathi kwayo ezinye ziphansi.
“Abantu abazama ukuzitshontsha izipanela lezi batshaywa yimpama abangayiboniyo. Ngikhuluma nje mina ngabona esinye isakhamuzi engangihamba laso saquma indlela sithi siyathatha izipanela lezi ngasibona sesiwele phansi.
Ngathi ngisibuza ukuthi kuhamba njani sathi sitshaywe ngumuntu ngempama kodwa kasimbonanga,” kutsho uMnu Moyo.
“Lokhu kwenza ngakholwa sibili ukuthi liqiniso ukuba i-trailer le kayithintwa ngoba iyatshaya. Okwangimangalisayo yikuthi ngemva kokutshaywa kwakhe kazange wagula ngitsho njalo akulalutho olubi olwamvelelayo,” kuveza uMnu Moyo.
Ekhuluma lentatheli uNkosazana Lindani Mathe uthe kufanele bazame icebo ngale i-trailer ngoba lizalimaza abantwana ngokubatshaya nxa bethe badlalela kiyo.
“I-trailer le iyingozi sibili ikakhulu ebantwaneni ngoba ingaqhubeka ilapha izalimaza abantwana ngokubatshaya.
Njengoba bethi ungatshaywa yimpama yakhona uyawela phansi kutsho ukuthi umntwana ingamtshaya iyamlimaza sibili.
“Ngalokhu kufanele sizame amacebo okulisusa lapha njengezakhamizi, asazi ukuthi singenza njani njengoba itshaya,” kutsho uNkszn Mathe.
Obambele usobhuku kule indawo uMnumzana Simon Ncube uthe kuliqiniso ukuthi kule-trailer etshaya abantu njalo iqondile nxa ibatshaya ngoba ngamasela.
“Kuliqiniso sibili ukuthi kule-trailer etshaya abantu emgwaqweni kodwa sesaswela amacebo okuyisusa ngoba iyatshaya.
“Okunye njalo okwenza itshaye abantu yikuthi bayabe befuna ukutshontsha insimbi ezikulo abanye befuna ukuyisika bathathe amazenge. Ngalokhu-ke iqondile nxa ibatshaya ngoba bagangile sibili,” kuphetha uMnu Ncube.
Online Reporter