adminNcekwenhle Ncube
NGENXA yokuthanda utshwala kulomakorokoza weNyathi osele ethoba amanxeba kulandela ukugongodwa ngelitshe ekhanda ngomunye wakhe kubangwa ukuthi ubaleke lotshwala.
UClarence okungasatholakalanga isibongo sakhe, odume ngokuthi Kila uhlaselwe nguSandile Ndhlovu ngelanga leKhisimusi ezitolo zakoBadala eNyathi selisiya ngomtsha wendoda.
Kubikwa uKila kanye loNdlovu bathenga utshwala bebonke kodwa uKila wasebaleka lotshwala wayazinathela labangane bakhe.
Omunye umfakazi othande ukwaziwa ngokuthi nguMthabisi uchaze ukuthi amajaha la ajayele ukunatha wonke ngoba bevele bekorokoza ndawonye komunye umgodi oseduze lezitampa zakoPhilip.
Uchaze ukuthi utshwala babuthenga emini njalo kukhanya babengazuzanga imali ngoba behluleka ukugigisa isitofu sabo kwaze kwafika ilanga lekhisimusi.
Kwathi kunjalo uKila wathatha utshwala ababebuthenge lomngane wakhe wayabunatha lamanye amajaha abajayele ukudlala bonke ibhola.
Lokhu akuzange kumphathe kuhle uNdlovu owafunga wathi uzamnathela utshwala ukuze ambonise ukuthi yena kadlalelwa.
Intatheli izwe ukuthi ilanga lathi selibanga kunina baqalisa ukulwa kodwa abantu bekela ukubalamula becabanga ukuthi bayadlala.
Kubikwa bazama ukuthi bebalamule ngemva kokuthi uClarence selume umngane wakhe indlebe ngoba wayesemkhulela. Kodwa uSandile wadobha imbokodo yelitshe wamtshaya ngayo ekhanda waqhatsha.
Omunye umfakazi owayekhona ngesikhathi kusenzakala lokhu uNkosiphile Khuphe uveze ukuthi babona angathi uKila sefile ngemva kokutshywa ngelitshe.
“UKila watshaywa ngembokodo esabekayo waqhatsha saze samthela ngotshwala kanye lamanzi aqandayo ukuze aphaphame. Lokuphefumula wayengasaphefumuli,” kulandisa uKhuphe.
Uqhubekele phambili esithi indaba le kayizange ibikelwe amapholisa ngoba ababili laba bangabangane.
Kubikwa esephapheme abanye abangane bakhe abatsheketsha bonke bamthatha bamhambisa endlini yakhe lapho aloja khona. Kukanti uNdlovu yena wahle wadliwa ngumswenya.
Imizamo yokukhuluma lababili laba yehlule.
Online Reporter