admin
ABATSHAYELI batshaye amahuta baze badela lapho besedlula indoda ebizihambela inqunu calaceleni ezitaladeni zeBloemfontein kweleSouth Africa ngempelaviki.
Amahuta ezimota labantu abakade betshaya ukhwelo kukhanya akuzange kumthinte lakancane lundoda ongaziwayo nanko pela uqinise ikhanda wazihambela sengathi akulanto emangalisayo ngesimo sakhe.
Kubikwa ubechapha umgwaqo ahambe kwelinye icele andubana achaphe njalo enganaki lutho.
Uze wasizwa ngamapholisa lawo aqale wawathwalisa nzima ngokuwabalekela andubana ambambe. Indoda le kayizange iwuvule owayo lapho abantu beyithethisa beyitshela ukuthi kayiyegqoka ngoba lokhu ekwenzayo kulihlazo. Omunye obesebenza ukugebha eceleni komgwaqo uthe: “Wena siwula hamba uyegqoka, uyasiyangisa, hamba uyethi owakuloyayo akuxolele ukuze uphephe.”
Abantu bebecabanga ukuthi indoda le kayikhulumi kodwa yaqala ukukhuluma isibanjwe ngamapholisa.
“Kangihlanyi mina. Ngiyekelani ngizihambele ngifuna ukuya lapho engiyakhona nje, angihluphanga muntu mina,” kutsho lindoda.
Isikhulumi samapholisa uConstable Wendy Nkabi uthe: “Indoda le ebihamba nqunu ihanjiswe esibhedlela ukuze iyehlolwa.
“Sikhangelele ukuthi sibone impumela yokuhlolwa kwayo ukuze sazi ukuthi ibulawa ngumkhuhlane wengqondo kumbe kukhona okunye okuyihluphayo. Akula dokhethi esiyivulileyo.” — Ubulembu
Online Reporter