admin
Listen Ndlovu
ABALIMI abafuya inkomo zochago baxwayiswa ukuthi babone ukuba indawo abasengela kuzo zihlanzekile ukuze kuvikelwe imikhuhlane.
UMnunzana Cosmas Muzunde onguDairy Officer emawofisini akoBulawayo abona ngezezifuyo uthe indawo umlimi asengela kiyo ingadala ukuchitheka kwebhizimusi lochago.
“Kuqakathekile ukuthi umlimi aqinisekise ukuhlanzeka kwendawo yakhe yokusengela nxa efuna ukuqhuba kuhle ibhizimusi lakhe lechago ngoba imikhuhlane iyamemetheka lasendaweni zokusengela,” kuxwaya uMnu Muzunde.
Uqhubekele phambili esithi imikhuhlane ehlasela inkomo zochago ebangela ibhizimusi ukuthi ingaqhubi kuhle igoqela imastitis kanye lecontagious abortion.
“Uma isifuyo sihlaselwe ngumkhuhlane we-mastitis uchago lwayo luyabe lungasalungelanga ukudliwa ngabantu ngoba umkhuhlane lo uyingozi ebantwini. Lokhu kudala ukuchitheka kwebhizimusi’, kutsho uMnunzana Muzunde.
Ungezelele wathi abalimi kumele njalo bavikela umkhuhlane weContagious abortion.
“I-contagious abortion enkomeni zochago iyaphambanisa ibhizimusi. Umkhuhlane lo ubangelwa ngamagcikwane atshiyeneyo atholakala endaweni zokusengela.
“Isifuyo sicina singasehlisi kakhulu, kumbe sichithekelwe yisisu loba icine izala ithole eligulayo.
Uthe umuntu engadla uchago olusengwe enkomeni elomkhuhlane lo ulakho ukuba lawo.
“Abalimi bakhuthazwa ukuthi baqinisekise ukuhlanzeka kwendawo abasengela kuyo, njalo bahlolise uchago lwabo kulabo abakhangela ngenkomo zochago ukuze bathole usizo lokuvikela izifuyo zabo emkhuhlaneni lo,” kuphetha uMnu Muzunde.
Online Reporter