admin
Nkosilathi Sibanda
INENGI simazi umuyi uNdumiso Gumede njengengcitshi yezokukhokhelwa komdlalo wenguqu, kodwa kulabangane bakhe abamazi njengendoda eyayithanda ubunandi lokuthokozisa abantu.
Izikhulumi ezitshiyeneyo ziyichaze kabanzi imbali kaGumede kusukela ngelanga edlula emhlabeni mhlaka 29 Mpalakazi 2021 langesikhathi esiyangcwatshwa ngoLwesibili kuyonale iviki.
Kubo bonke abakhulumileyo, uVincent Pamire ukubeke sobala ukuthi uGumede ubethanda ukuzithokozisa. UPamire, owake waba ngumkhokheli weZimbabwe Football Association leqembu leZimbabwe Saints njalo ubengumngane omkhulu kaGumede. Bobabili basebenza bonke kunguqu kusukela besakhula.
Katshayanga inja emfihla umphini umngane kamuyi lo etshela abantu ukuthi umhlonitshwa uGumede ubengumuntu wabantu, obethanda ukukholisa.
“Ikhona into elingayaziyo ngoGumede. UGumede ubethanda ubunandi, ngatshelwa nguMaSongo umama kaGumede,” nguPamire lo ekhuluma kumbuthano wesikhumbuzo sikamuyi oqhutshelwe enkundleni ye-Amphitheatre ngoMvulo.
Uchaze ukuba uGumede wayengumuntu wabantu, ethanda ukutshona labantu, okuyikhona okwamenza waba yinkokheli yodumo.
UPamire uthe umngane wakhe utshiye imbali enhle kunguqu ngoba ngesikhathi eyinkokheli kuZifa, amaWarriors ayekunombolo engcono kulogu yamazwe.
“Utshiye imbali enhle kuZifa, lokhu sikubona ngama-Fifa rankings.”
Kusenjalo, uGumede ungcwatshwe ngoLwesibili emini eNyathi, esabelweni seMatabeleland North lapho obekubuthene inengi labandeli beHighlanders, abahlonitshwa kwezombusazwe, inkokheli zomdabu lomphakathi ovela endaweni ezehlukeneyo.
Online Reporter