Online Reporter
Nkosilathi Sibanda
UMPHAKATHI uvukele ukuzwa udaba olunzima ngoLwesibili, kuvela ukuthi kulepholisa eseliziveze ukuthi yilo eladubula u-Detective Constable Cassandra Hove kumaviki amabili adluleyo.
Ipholisa leli, u-Constable Nomore Muradzikwa osebenzela eHillside Police Station uvele phambi kukaMantshi wakoBulawayo, uMnumzana Maxwell Ncube, ngecala lokubulala, ngoLwesibili emini.
Ngesikhathi kusalungisiswa amaphepha ecala lakhe, uMuradzikwa, oleminyaka yokuzalwa engu-37, ubonakale phandle komthethwandaba wabomantshi eTredgold Building ebobotheka emi lamanye amapholisa akade embophile.
Ubephethe ebobotheka njalo lalapho intatheli zimthatha imifanekiso, umetheswacala lo ubebuza ukuthi “Kalidinwa ngokungishuta imifanekiso?”
Ubebhoda amahofisi lamapholisa kodwa kukhanya ukuthi uwajwayele amahofisini la, nanko phela laye bekungumsebenzi wakhe wokuletha izibotshwa emthethwandaba. Impilo iguqukile, sekunguye ongeniswa efakwe izankosi.
Isimo sakhe besingahambelani lomuntu owenze icala elikhulu, lokubulala omunye.
Ngehola lesibili emini, kuqale ukuthethwa kwecala lakhe kodwa akuzange kwedlule imizuzu elitshumi. UMantshi uNcube kazange achithe isikhathi, njalo kazange abuze uMuradzikwa ukuthi uyaliphika yini icala. Umetheswacala uhanjiswe esitokisini njalo uzaphenduka emthethwandaba mhlaka 1 Mabasa. Ucetshiswe ukuthi afake isicelo sebheyili emthethwandaba weHigh Court koBulawayo.
Umelwe ligqwetha, uMnumzana Tinashe Tashaya owe-Sengweni Legal Services. Umtshutshisi wodaba bekunguNkosazana Nkanyezi Xaba. Isimanga ngometheswacala yikuthi phambilini ubebika ukuba kalifuni igqwetha, esithi uzazikhulumela.
Inkundla izwe ukuba mhlaka 6 Mbimbitho, ngo- 8.30pm, uMuradzikwa lomuyi babeyingxenye yequla lamapholisa ayedinga ulwazi mayelana ngecala thile lobugebengu.
Kuncwadi ezisemthethwandaba, uMuradzikwa wayehlome ngombhobho wohlobo lwe-CZ pistol. Kubikwa wayesondelela uFikile Ncube (26), osolelwa kucala lobugebengu, ohlala ku14804 ePumula South koBulawayo.
“Wadonsa isikhali sakhe wadubula uNcube, uhlamvu lwamtshaya kundololwane yesandleni senxele, andubana luyetshaya umufi kanye ebeleni,” inkundla ikuzwile lokhu.
Kodwa-ke, amanye amalunga emuli yakoHove akade ekhona abike ukuthi azwe ngokuthi udaba selufike emthethwandaba enkundleni zokuxhumana.
Baphinde baveza ukungasuthiseki ngendlela amapholisa aphathe ngayo udaba, bekhonona ngokufihlelwa ngophenyo obelusenziwa.
Ekhuluma lentatheli, uMnumzana Abias Hove ongumfowabo kamuyi, uthe bekungaba yikuhlakanipha ukuthi amapholisa ababikele ukuze zonke izihlobo zikwazi ukuya emthethwandaba ukuzolalela okwenzakalayo.
“Sisanda kuthola lokhu lamuhla (ngoLwesibili), ngemva kokubona emaphephandabeni ebulenjini lakunkundla zokuxhumana. Ngicabanga ukuthi amapholisa kumele asazise ngalokhu. Siphoxekile ukuthi abakwenzanga lokho,” kutsho uMnu Hove.
