Online Reporter
YiNtatheli kaMthunywa
KULENDODA ebidinga ubunandi boluju bemvelo ingazi ukuthi kuzaphetha ngezililo.
Okuqale kungumdlalo omuhle, kuphethe sekuhlengezelwa izinyembezi lapho indoda le, edume ngelithi “Marabha” eMakokoba ekhetshe khona inina elisuke lafa ngemva kwalokho.
Inina leli, ngokuzwa kwentatheli kuthiwa nguSheron njalo kuzwakale ukuba lidabuka eGwanda.
Indaba le sekunathiswana ngayo itiye elokitshini elidala koBulawayo, yenzakale ngeSonto edluleyo.
Kubikwa uMarabha lo wakhetsha inina leli, okuthiwa libizwa ngokuthi “Sie” kwezinye indawo ngoMgqibelo ntambama.
Bobabili bavumelana ukuthi baye emacansini. Kuthe kusisa kwavela imihlolo, nanko inina leli kalizange lisavuka, kwatholakala ukuthi selifile.
Isehlakalo lesi, esenzakala kwenye indlu esesitaladeni sika- 3rd Street eMakokoba, sisematheni ezakhamizi zakuleli lokitshi ezavuka zisizwa ngomhlolo lo zagijima zayazibonela mathupha.
Babuthana abantu ngeSonto ekuseni bedinga ukuzwisisa ngokwenzakeleyo. Abafakazi abaqotho kuloludaba, bancwebe intatheli ukuthi uMarabha wayenatha utshwala loMnu Nation Sithole laye ohlala eMakokoba.
Kuthe sebedle amabele, uMarabha wakhangwa yibucwazicwazi bukamuyi, wasemkhombisa, emcela ukuthi bayencinda uluju lwemvelo. Bobabili bavumelana, kodwa kwaswelakala indawo.
Kubikwa uMarabha wacela indawo yokulala kumngane wakhe uMnu Sithole, owaba lomusa wamnika imvumo yokuthi balale ngakibo, endlini yemuli yakoSithole.
“Yindaba ebuhlungu le. Sizwe ukuthi indoda le yakhetsha kodwa ingelandawo lapho engalala khona ledlalicatsha layo. Yacela indawo yokulala kumngane, wayithola.
“Kwaba kuhle bengena endlini, besiyalala. Benza ababekuvumelene kodwa ngeSonto ekuseni, yathola ukuthi inina leli kalisavuki. Kwaqhamuka isililo ekuseni, owesifazane owayekhetshiwe engasavuki. Wayesefile,” kutsho omunye wabafakazi ongumakhelwane ku-3rd Street.
Kusenjalo, iphephandaba likazulu lithole udletshana lokuthi imuli yakomuyi izafika lapho afela khona ukuzo “gezisa” ukuze athole ukuphumula ngokuthula.
“Bathe bazabuya bezogezisa lapho afela khona. Kuhle ngoba kukhanya bayazwisisisa njalo bafuna umntanabo abekwe ngendlela eyiyo ukuze kungabi lokukhathazeka kibo lakulo oweyemkhetshile,” kutsho ilunga lomdeni elingafunanga ukuqanjwa ngebizo.
Amapholisa koBulawayo kazange aphendule ngesikhathi mayelana ngodaba, nanko osabambe indawo yesikhulumi sawo esabelweni sakoBulawayo u-Assistant Inspector Nomalanga Msebele uthe usadinga udaba eMzilikazi Police Station.
