Online Reporter
Abel Ndooka
KUNOTSVA demo kugosara mupinyi kunhandare dzakasiyana svondo rino apo zvikwata zvinokwikwidza muCastle Lager Premiership zvichabandana muchikamu chekutanga chemutambo weChibuku Super Cup.
Mutambo uyu, unove wechipiri mukuru wenhabvu muZimbabwe, uchaona shasha ichasimudza mukombe ichiwaniswa mukana wekunotamba kuCAF Confederations Cup.
Makore maviri adarika, Dynamos FC ndiyo yange ichitora mukombe weChibuku Super Cup.
Izvi zvakaiona ichitamba mitambo yeCAF Confederations Cup gore radarika asi gore rino haina kuda kutamba nekuda kwezvikonzero zvakasiyana-siyana.
Mutambo wegore rino weChibuku wakatanga ne”preliminary round” iyo yakaona Yadah Stars neDynamos zvichitatsurana, kuchiti Triangle United neKwekwe United FC zvakabandanawo apo zvairwira kufambira mberi mumutambo uyu.
Mitambo iriko svondo rino, ichaona MWOS FC ichisangana neCAPS United kunhandare yeNgoni Stadium kuNorton mumutambo uyo unotarisirwa kunakidza zvekukunda ngoma kurira.
MWOS FC iri kupinda mumutambo uyu ichibva kukundwa neDynamos FC, kuchiti Kepe-kepe yakaumburudzwawo 2-1 neBikita Minerals.
Mamiriro ezvinhu aya anoreva kuti zvikwata izvi zvine gomo guru rekukwira apo zvichasangana musi weMugovera.
Pazvakambosangana mumutambo wePSL mwaka uno, MWOS ndiyo yakabuda iri pamusoro apo yakakunda Green Machine 2-1.
Yaimbove shasha yeChibuku Super Cup, FC Platinum, ichange iri pamusha payo kuMandava Stadium kuZvishavane musi weMugovera ichatamba neManica Diamonds.
Pure Platinum Play, iyo mwaka uno yange ichinetsa kukunda, svondo radarika yakazvambaradzwa 5-2 neScottland.
Izvi zvakakatyamadza vatsigiri vazhinji venhabvu naizvozvo svondo rino ichange ichitodya magaka mambishi.
Chikwata chaNorman Mapeza chinoziva zvikuru kukosha kwemukombe uyu sezvo chakambouhwina kare.
Kuchiti Manica Diamonds, iyo isati yambohwina mukombe uyu, ichatokunya dzisimbe sezvo kare yakamboburitswa musemi-final yemutambo uyu neDeMbare.
Shasha yePSL yemwaka wadarika, Simba Bhora ichange iri pamusha payo kuWadzanayi Stadium kuShamva ichatamba nechikwata chichahwina pakati peYadah Stars neDeMbare.
Simba Bhora haisati yambohwina mukombe weChibuku saka gore rino inogona kutorwa semvumba kuti igousimudzawo.
Pari zvino palogo rePSL, Simba Bhora ndiyo iri kutungamira kureva kuti ichiri nemukana mukuru wekuhwina mikombe miviri kana ikaramba ichihwina mitambo yayo yese iri kutevera.
Scottland FC ichatamba mutambo wayo wekutanga wemuChibuku Super Cup munhoroondo yechikwata ichi apo ichasangana neGreenfuel kuSakubva Stadium kwaMutare.
Chikwata chaTonderayi ‘Stanza’ Ndiraya Scottland chiri kupinda mumutambo uyu morari yacho yakasimuka zvichitevera kurakasha kwachakaita FC Platinum svondo radarika.
Kuchiti Boys Dzenharo dzakaenda kuNyamhunga Stadium kunorikita ZPC Kariba 1-0 pamusha payo.
Zvakadaro, mitambo miviri inoti weZPC Kariba neChicken Inn uye neweHerentals College neHighlanders yakambomiswa nekuda kwekuti nhandare yeNyamhunga Stadium svondo rino ichange ichishandiswa pamhemberero dzekucherechedza zuva remagamba.
