Online Reporter
Abel Ndooka
KUCHANGE kusingadanwe anonzwa nemusi weMugovera neSvondo paCity Sports Centre, muHarare apo shasha dzetaekwondo dzichabandana mumutambo weHarare Mayor’s Challenge Cup Taekwondo Championship.
Mutambo uyu uchaona shasha dzinobva kunyika dzakasiyana dzemudunhu reSADC dzichikwikwidza.
Sachigaro weHarare City Martial Arts Club – Sensei Martin Chimombe – anoti mutambo uyu wakakosha zvikuru nekuti uchabatsira vatambi kuti vetaekwondo vagosimukira.
“Tine Mufaro mukuru kuti mutambo weHarare Mayor’s Challenge Cup Taekwondo Championship wadzoka zvakare uye gore rino shasha dzemartial arts dzichange dzichibandana.
“Gore rino, mutambo wedu uyu mukuru chaizvo nekuti tiri kutarisira shasha dziri kubva kunyika dzakasiyana dzemuSADC, vatambi vanosvika 200 kuti vagouya kuzokwikwidza,” anodaro.
Sensei Chimombe anoti parizvino vatambi vanobva kuEswatini vakatonyoresa kuti vazokwikwidza pamutambo uyu asi vari kutarisira vamwe vachabva kunyika dzinosanganisira South Africa, Botswana, Mozambique uye Namibia.
“Kuuya kwevatambi vanobva kune dzimwe nyika kuchabatsira zvikuru kuti tione kuti vatambi vedu vari kusimuka zvakadii mutaekwondo,” anodaro.
