Online Reporter
Abel Ndooka
HAKUDANWE anonzwa nemusi weSvondo uno apo shasha yeCastle Premiership, Scottland FC, ichasangana neDynamos FC kuRufaro Stadium muHarare mumutambo weCastle Challenge Cup.
Mutambo uyu unotambwa gore negore mwaka wePremier Soccer League usati watanga.
Unotambwa pakati pechikwata chinenge chakahwinha mukombe wePSL nechakahwinha Chibuku Super Cup mumwaka unenge wadarika.
Scottland FC kana kuti Mabvirabvira iri kutamba mutambo uyu kekutanga munhoroondo yayo zvichitevera kuhwina kwayakaita mukombe wePSL ichangopinda muPSL mugore ra2025.
Nerimwe divi, DeMbare iri kutamba mutambo uyu kechitatu kakatevedzana sezvo yave nemakore matatu ichingohwina mukombe weChibuku Super Cup.
Dynamos iri kupinda mumutambo uyu ichitarisira kuhwina kechipiri zvichitevera kuhwina kwayakaita mukombe uyu gore radarika apo yakakundira Simba Bhora kumapena sezvo mutambo uyu wainge wapera ari mangange 1-1.
DeMbare zvese naScottland FC zviri kupindawo mumutambo uyu zvichitungamirirwa nevarairidzi vatsva.
DeMbare iri kurairidzwa naGenesis ‘Kaka’ Mangombe uyo akatsiva Kelvin Kaindu mushure mekunge achangobva kuitungamira kuhwina mukombe weChibuku Super Cup achienda kunotora basa kuvakomana vatsva veHardrock FC.
Scottland iri kurairidzwa naNorman ‘Muchina wemajuzi’ Mapeza uyo akatsiva Tonderayi ‘Stanza’ Ndiraya zvichitevera kubva kwaakaita kuMabvirabvira atungamira chikwata ichi kuhwina mukombe wePSL.
Pari zvino Stanza ave kuChicken Inn FC kana kuti maGamecocks.
Scottland FC neDynamos ndizvo zvikwata zvichamirira nyika zvakare mumitambo yeCAF yegore rino, Scottland ichakwikwidza muCAF Champions League kuchiti DeMbare ichakwikwidza CAF Confederations Cup.
