Online Reporter
Abel Ndooka
MWAKA wenhabvu wa2026 weCastle Lager Premiership uri kutanga nemusi weChishanu svondo rino apo pachaona chikwata cheHunters FC, icho chiri kutamba muPremier Soccer League kekutanga, chichitatsurana neMWOS FC kuRufaro Stadium, muHarare.
Hunters FC yakapinda muPSL zvichitevera kuhwina kwayakaita mukombe weEastern Region Division One mwaka wadarika uye chimwe chezvikwata zvina zvinosanganisira Agama FC, Hardrock FC neBulawayo Chiefs zvakapinda muPSL gore rino.
Mutambo mukuru wakatarisirwa svondo rino uchange pakati peshasha yePSL, Scottland FC, iyo iri kunanga kuKwekwe kunosangana neHardrock FC kunhandare yeChahwanda Stadium musi weSvondo.
Scottland iri kupinda mumutambo uyu morari yayo yakasimuka zvichitevera kuzvambaradza kwayakaita Dynamos FC mumutambo weCastle Challenge Cup uyo wakatambirwa kuRufaro musi weSvondo wadarika.
Mabviravira yakaumburudza DeMbare 5-0 mumutambo uyu izvo zvakabva zvatumira shoko kune zvikwata zvese zvemuPSL kuti haisi kudzora tsvimbo mumwaka wegore rino.
Chikwata ichi chichange chichirwira mikombe mitatu inoti wePSL, Chibuku Super Cup neCAF Champions League.
Hardrock FC payakapinda muPSL, yakatanga nekutenga vatambi vepamusoro kurakidza kuti haina kuuya kuzoita zvedambe muligi iri.
Chikwata ichi chakatanga nekugadza Kelvin Kaindu pachigaro chinopisa chekurairidza.
Kaindu akange achangobva kutungamira Dynamos kuhwina mukombe weChibuku Super Cup pamwe nekurwira kubatsira chikwata ichi kuti chirambe chiri muPSL mwaka wadarika.
Simba Bhora iri kunanga kuGibbo Stadium kuTriangle uko ichanosangana neManica Diamonds FC.
Go Buju Go chimwe chezvikwata zvichange zvichirwira mukombe wePSL mwaka uno sezvo yakatenga vatambi vatsva uye inotarisirwa kurwa semvumba kuti mukombe wePSL udzoke kuShamva mwaka uno sezvo yakambouhwinha.
DeMbare iri kuenda kumazivandadzoka kuAscot Stadium uko ichatatsurana neTelOne FC musi weMugovera, kuchiti CAPS United ichasangana neAgama FC musi weSvondo kuRufaro Stadium.
KuBaobab Stadium, kuchange kusingadanwe anonzwa mumutambo uchaona Ngezi Platinum Stars neFC Platinum zvichibandana musi weMugovera.
FC Platinum mwaka uno iri kutungamirirwa naJoel ‘Dubai’ Luphahla uyo akatsiva Norman Mapeza ave kutungamira Scottland FC.
