admin
Muchaneta Chimuka
VABEREKI vane vana vakaremara mitezo avo vanova nhengo dzesangano reZimbabwe Parents of Handicapped Children Association (ZPHCA) svondo rapera vakasara vaine kufara kukuru zvichitevera rubatsiro rwechikafu nezvimwe zvinhu zvekushandisa zvinokosha US$10 000 zvavakapihwa nemudzimai wemumiriri wenyika yeChina muno, Amai Wang Wei, kumuzinda wavo muguta reHarare.
Vachitaura pakutambidza zvinhu izvi, Amai Wang Wei vanoti vakaona zvakakosha kuti vabatsire vanotambura pamwe nekusimudzira kodzero dzevana vakaremara.
“Ndinofara nemabasa makukutu ari kuitwa nesangano reZPHCA nekupa kwavanoita mikana uye kuchengetedza vana vakaremara. Mwana akaremara anofanira kuwaniswa kodzero dzakangoenzana neasina. Kodzero idzi dzinosanganisira kuwaniswa chikafu, zvekupfeka, utano, chengetedzo nedzidzo, pakati pezvimwe,” vanodaro.
Amai Wang Wei vanotenda Hurumende nekutsigira kodzero dzevana vakaremara kuburikidza nekudzikwa kwemitemo inovachengetedza.
Mai Miriam Kangai, vanova mukuru weZPHA, vanotenda rutsigiro urwu vachiti rwuchasandura raramo yevana vakaremara.
“Sezvamunoona, vamwe vana vari pano havataure, vanozviitira tsvina varere panhovo, vamwe havagoni kana kusimudza musoro saka idambudziko guru rinosangana nevabereki vanochengeta vana ivava.
“Rutsigiro urwu rwuchasandura upenyu hwevana vakaremara zvikuru muguva ino apo chikafu nezvekushandisa zviri kudhura,” vanodaro.
Amai Silindiwe Siziba (40) vanove mubereki ane mwana akaremara vanoti zvinhu zvinodiwa nevana ava zvinodhura uye sevabereki vasingashandi zvinovaomera.
Zvinhu zvakapihwa vana ava zvinosanganisira madhondoro ekufambisa, sipo dzekugezesa nedzekuwachisa, dovi, mafuta, munyu, matemba, bhinzi, zvinwiwa, zvekushandisa panguva yekutevera nezvimwe zvakawanda.
Online Reporter