Mukadzi hutu nababa ve‘panext-door’

Milcah Nhakura
MUMWE murume anoti akagurwa kunorira nemuvakidzani wake uyo waanoona sababa uyo akamutorera mudzimai wake.
Izvi zvakabuda mudare reHarare Civil Court apo Tendai Chitambu akamhan’arira Zhuwao Kachoro achiti ari kugara achimurova achimupomera mhosva yekumutorera mukadzi wake.
Mutongi Trevor Nyatsanza akapa Chitambu gwaro rinomudzivirira.
Chitambu anoti ashaiswa rugare naKachoro.
“Murume uyu muvakidzani wangu asi anondipomera mhosva yekumutorera mudzimai wake. Anotondigadzirira nyaya kuti ndisungwe nekutuma vanhu kuti vandirove. Handichina mufaro nekuti ndave kutya kugara ndichirohwa.
“Ndinomuudza kuti handidanane neaimbove mudzimai wake. Ini handidi zvangu zvemhirizhonga,” anodaro.
Achipawo divi rake, Kachoro anoti Chitambu ari kunyepera dare.
“Murume uyu ndinotomutora sababa asi pandakanzwa nyaya yekudanana nemudzimai wangu ndakatomubvunza akaramba. Takambonetsana kwekanguva nemudzimai wangu tisati tarambana.
“Chitambu akatora ‘advantage’ yekunetsana kwedu, ndipo pavakatanga kudanana. Vatouya vose nemukadzi wangu natezvara kudare kuratidza kuti vanodanana,” anodaro.
“Tine vana vana tose saka ndaifunga kuti pamwe anganyarawo, asi havatombondiremekedzi . Zvese zvekuti ndinomurova ndezvekunyepa.”