adminNDAUWE ndauwe! Ngatikumanehe pabadla nyamashi petinoreketa ngedzedu dzekanyi. Ntekwe dziri kanyi, ngatifembedzane ntekweyo pamwepo. Nyamashi tinode kureketa ngemachikichori, zviro zvinodakadza.
Kana uri ndombi, unokarire kuti jaha rako richarekete masoko anotapira kudarike uchi. Nyamashi tiri kureketa ngeNdau Annual Festival inoitwa kamwe ngegore kwaBangira, kuChipinge, paNdau inozwi Paiyapo Cultural Centre.
Zuro ndaireketa naPhllip Kusasa, uyo wakabate matomu pakunasirire mutambo uyu. Iye emene uri kuti zviro zveshe, pari zvino zviri kuhamba kahle. Tinobonga bambomunini Phillip.
Mutambo uyu wetinoreketa ndiwo uriyo vhiki rino ngeMugobera, 23 September. Ngatiuye teeshe ngekuwanda kwedu hama neshamwari. Zvikora zveeshe zviri mudhuze mudhuze, ndapota uyai mweeshe. Uyai muzwe kudetemba kwakadzama ngechiNdau.
Kunonga kweitambwe mutshongoyo wemene wemakarekare.
Mbira dzinonga dziripo. Apadaidzwi unozwa pamudhibano uno akhiti woye. Chimatende icho chinoridzwa ndiDr Tafataona Mahoso chinonga chiriyo cheiridzwa ngemadharamadhara anobuda ngemwaChikwakwa.
Anonga ariyo asikana akaseja akapfeke zvikhisa. Saka kukhisana akuperi zuwero akhiti. Kudakara akuna magumo ngemugobera. Pupu gwendere pasina mabori. Ngatikumane akomana woye mweya nenyama zvakabatana.
Kurya kwechiNdau kunonga kwakati chakata. Sadza remungoza, mhunga, magwere nemafunde rinonga riri fararira. Nyama yacho mazondo nehloko.
Tisariyarwa akadi, nyama yehuku dzechiNdau dzinoti mukurukutwa, chinheya nechinzerengwa. Chinzerengwa kahuku kaya kane manhenga akati farara mudenga kunga chikhisa. Akabviri nako ngekuzipa, akazwi hekaripozvo.
ChiNdau chemene chinotangire mupfungwa dzako. Umwe naumwe ngaaite chihwerehwere chesoko remudhibano uno.
Online Reporter