Online Reporter
Abel Ndooka
MUIMBI weAfro-fusion ane mukurumbira — Tongai “Chirandu” Tarubona — haasi kudzokera kumashure.
Tarubona, uyo anotungamira chikwata cheThe Black Identity, akabura dambarefu rake rechi16 rinonzi “Ndezvepano Pasi”, iro rine nziyo ina.
Achitaura pamusoro pedambarefu iri, Chirandu anoti akaritsikisa sezvo zvemimhanzi zviri muropa rake uye anonzwa kufara paanenge achitsikisa mimhanzi, iyo inodzidzisa vanhu vemazera akasiyana-siyana.
“Rwendo rwandafamba mune zvemimhanzi rwakakura zvekuti ndiri kunzwa manyukunyuku kuti ndakwanisa kutsikisa nekuparura dambarefu rangu rechi16.
“Hazvisi nyore; zvinotoda kushingirira chaizvo nekuti mumimhanzi unosangana nezvakawanda. Saka, semuimbi, unofanirwa kugara uchibika mimhanzi mitsva zvichiendererana nezvinenge zvichiitika muhupenyu, uchipa dzidziso uye chenjedzo kune vatsigiri vako kuti vagare vakangwarira,” anodaro Chirandu.
Padambarefu rake iri, pane nziyo dzinoti “Kutsinzina Hakusi Kunamata”, “Mwana Wemusango”, “Musandidzora” uye “Kupindana Kwenguva”.
Chirandu anonyanya kuzivikanwa nenziyo dzinoti “Stress”, “Maminimini Pakirawa”, “Mutoriro Nemujolo”, “Vatete” uye “Ziso Rinoparira”.
