Online Reporter
ZINENGI izigigaba ezihlasimulisa igazi ezenziwa ngosomabhizimusi labanye abathengisayo ukuze izinto zabo zithengwe, okunye umuntu usuka azibuze ukuthi kambe liqiniso sibili umuntu angaba lesibindi sokuganga ngaleyondlela?
Asazi kunzima okwenzakala lapha phandle, yikuthanda imali njengoba lebhayibhili elingcwele lisitsho nje ukuthi imali yimpande yesono. Kukanengi sisizwa ngezehlakalo ezisukumisa inwele, umzimba utshwaqe ngoba zisethusa, kodwa nxa kuliqiniso lokho abantu kuyadingeka ukuba babe lenhliziyo hatshi ukuganga.
Kuleviki nje kuphela kuphume indaba ezimbili kuphephandaba lethu ebulenjini ezethusayo. Kulodaba losane lweFilabusi olulamaviki ayisificaminwe mibili unina aphume walutshiya lulele esiya kwelinye ikamelo esiyakudla wafica usane lwakhe solufile lusikwe amakhala kunye lesihlathi.
Kudaba lwesibili olusabalale kunkundla zokuxhumana kuyonale iviki kubikwa ukuthi kulomntwana oleminyaka elitshumi obizwe ngelinye inina lamhlaba ngejekiseni lithatha igazi lalo umntwana. Akwaziwa ukuthi inina leli elilebhizimusi yokuthengisa lwenzelani lokhu kodwa okugijima engqondweni yikuba mhlawumbe inina leli belifuna ukuganga ngegazi leli njengoba inengi kunakanelwa ukuba liyavakatshela izinyanga kanye labosiyazi batshelwe ukuba kumele benze izinto ezethusayo kulokuthi bafulathele abantu labo baqunga isibindi benze lokhu abayabe belaywe ukuba bakwenze ngoba befuna imali.
Siyasizwe njalo ngalabo abathengisa ukudla okwehlukeneyo okuphekiweyo kunakanelwa ukuba labo benza imithani thani kulokho kudla abakuthengisayo ngoba befuna abathengi babhuze okwenyosi bezothenga, asazi kumbe lokho okugcwele endebeni zabantu liqiniso na?
Uzwe sokuthiwa unazibani ulesandlana esingaziwayo esihlala phakathi kwembiza apheka ngayo.
Nxa kuyikho elikwenzayo bathengisi hatshi akelicabangele abanye abantu. Aluba wena ungumthengi ungezwa njani udliswa ingcekeza enjalo. Akube ngabantu abazixoxelayo nje ukuthi yinto elizenzayo lezo ngoba nxa kuliqiniso sibili kuyikho elikwenzayo lizikhuze, isiqokoqela yikuqhuba amabhizimusi enu ngokusenza gadalala hatshi ngemithi.
Ibhayibhili lithi umuntu kumele adle ngezithukuthuku zakhe hatshi ukuba abantu balimaze abanye abantu befuna ukuyalungiselwa imithi yokuthi babe lenotho. Inotho etholakala ngale indlela ikhohlakele ngaphansi kwelanga.
Kungumbono waleliphendaba ukuthi abantu bonke aluba badla izithukuthuku zabo bekele ukusebenzisa imithi ngoba konke okomuthi siyafika isikhathi sokuba kubhuluke, umuntu abuye aqale phansi.
